Եմենի հյուսիսում իշխող «Անսար Ալլա» (հութիներ) շիական շարժման ներկայացուցիչները ձերբակալել են ՄԱԿ-ի յոթ աշխատակցի։ Այս մասին, ՌԻԱ Նովոստիի փոխանցմամբ, հայտարարել է ՄԱԿ-ի գլխավոր քարտուղարի պաշտոնական ներկայացուցչի տեղակալ Ֆարհան Հաքը։
Եմենում ՄԱԿ-ի մարդասիրական հարցերով համակարգողի գրասենյակի տվյալներով` միջադեպը տեղի է ունեցել հունվարի 23-ին Սանայում։
«Ի պատասխան` մենք կասեցրել ենք բոլոր տեղաշարժերը այն շրջաններում, որոնք գտնվում են փաստացի իշխանությունների վերահսկողության տակ: Միջոցառումը կգործի մինչև հետագա ծանուցումը»,-նշել է Հաքը։
Նրա խոսքով` կազմակերպության ներկայացուցիչներն աշխատում են պահվող անձանց ազատ արձակելու ուղղությամբ։
ՄԱԿ-ի աշխատակիցների ձերբակալությունը տեղի է ունեցել 2023 թվականի նոյեմբերին Կարմիր ծովում հութիների գրաված Galaxy Leader լցանավի անձնակազմի ազատ արձակումից մի քանի օր անց։
Հիշեցնենք, որ 2023 թվականի հոկտեմբերին Եմենի հյուսիսում իշխող «Անսար Ալլա» շիական շարժումը հայտարարել էր, որ Գազայի հատվածում հրթիռային և օդային հարձակումների միջոցով աջակցելու է պաղեստինյան խմբավորումներին իսրայելական բանակի հետ դիմակայության հարցում։
Մասնավորապես, հութիները հայտարարել էին Իսրայելի հետ կապված ցանկացած նավի վրա հարձակվելու մտադրության մասին` մյուս երկրներին կոչ անելով հետ կանչել իրենց անձնակազմերը և չմոտենալ նրանց ծովում:
Դրա հետ մեկտեղ հութիները հայտարարել էին, որ չեն խանգարում տարածաշրջանում նավարկության ազատությանը և այլ երկրների նավերին չեն դիպչում։
0Comments