44–օրյա պատերազմի վերաբերյալ քննիչ հանձնաժողովի զեկույցը պատրաստ է, սակայն թե երբ այն կհրապարակվի, անհայտ է։ Այդ մասին ՀՀ Ազգային ժողովում ճեպազրույցի ժամանակ հայտարարեց ԱԺ պաշտպանության և անվտանգության հարցերի մշտական հանձնաժողովի ու քննիչ հանձնաժողովի նախագահ Անդրանիկ Քոչարյանը։
Նա չի կարծում, որ ինքն օրենք է խախտել զեկույցի ներկայացման ժամկետների հարցում։
«Օրենք չի խախտվել, չի խախտվելու. ՀՀ ԱԺ քննիչ հանձնաժողովի զեկույցը, երբ ներկայացվի լիագումար նիստին, այդ պահին քննիչ հանձնաժողովն իր աշխատանքները կհամարի ավարտված»,– հայտարարեց Քոչարյանը։
Նրա խոսքով` քանի դեռ ինքը ելույթ չի ունեցել ԱԺ–ում, քննիչ հանձնաժողովի աշխատանքը ավարտված չէ։ Քոչարյանը վստահեցրեց, որ զեկույցի ներկայացման ժամկետը մինչև 8–րդ գումարման ԱԺ-ի ավարտն է (2025 թ. հունիս-խմբ.), սակայն մինչ ավարտն այն կներկայացվի։
«Զեկույցը ոչ միայն պատրաստ է, այլև փորձաքննությունների փուլն է մտել` գաղտնիության հետ կապված, որ վաղը շահարկումներ չլինեն։ Հանրությունն իմանալու է այնքան, ինչքան իմանալու է. ամերիկյան հանրությունն իմացա՞վ՝ Քենեդուն ինչու սպանեցին։ Հանրությանը հուզող բոլոր հարցերի պատասխանները կիմանան բոլոր պետական կառույցների ղեկավարներն ու այն լրագրողները, որոնք գաղտնիության ռեժիմի հետ կապված թույլտվություն ունեն»,– ավելացրեց նա։
Թե ովքեր են այդ լրագրողները, Քոչարյանը չկարողացավ պատասխանել։
0Comments