Ռուսաստանը խորհրդակցում է Թուրքիայի հետ՝ Գազպրոմբանկի դեմ ԱՄՆ պատժամիջոցների շուրջ իրավիճակը կարգավորելու համար

Ռուսաստանը խորհրդակցություններ է անցկացնում Թուրքիայի հետ՝ կարգավորելու «Գազպրոմբանկի» դեմ ԱՄՆ-ի կողմից պատժամիջոցների կիրառման պատճառով ստեղծված իրավիճակը, որի միջոցով կատարվում են ռուսական էներգառեսուրսների դիմաց վճարումները, լրագրողներին ասել է Ստամբուլում Ռուսաստանի գլխավոր հյուպատոս Անդրեյ Բուրավովը, ըստ news.am-ի՝ փոխանցում է ՏԱՍՍ-ը։

«Մենք մշտապես խորհրդակցություններ ենք անցկացնում թուրքական կողմի հետ՝ որպես մեր ակտիվ, այսպես ասած, գործընկերներից մեկի»,- ասել է ռուս դիվանագետը։

Ըստ Բուրավովի, «որքան քիչ այս թեման հայտնվի հանրային տարածքում, այնքան լավ կլինի հանուն գործի շահերի»։ «Կան որոշ մանրամասներ, մեխանիզմներ, մեթոդներ, որոնք ընկալվում են որպես պատժամիջոցների շրջանցում, և դրանց առնչությամբ որոշ որոշումներ անմիջապես կայացվում են։ Սա հարվածում է հենց այն սխեմային, որը մշակվել է և, կարծես թե, օգնում է մեզ լուծել այս խնդիրները»,- հավելեց նա:

Գլխավոր հյուպատոսը հիշեցրել է, որ դեկտեմբերի 5-ին ՌԴ նախագահը իր հրամանագրով թարմացրել է օտարերկրյա գնորդների կողմից ռուսական գազի դիմաց վճարումների կարգը։ Մասնավորապես, արտասահմանյան ընկերություններն այժմ կարող են ռուսական գազի համար վճարել ոչ թե ուղղակիորեն «Գազպրոմբանկում» ունեցած հաշվի միջոցով, այլ միջոցներ փոխանցելով ռուսական մատակարարի ռուբլու հաշվին երրորդ անձանց միջոցով կամ փոխարկելով արժույթը ռուսական այլ բանկերում։

«Իրավիճակը ինչ-որ կերպ կարգավորելու համար նախագահի հրամանագրով ընդլայնվել է բանկերի ցանկը, որոնց միջոցով կարելի է գազի մատակարարման վճարային գործարքներ իրականացնել։ Այսինքն՝ կարող են օգտագործվել այլ բանկերը, որոնք պատժամիջոցների տակ չեն»,- ասել է նա։

Նոյեմբերի վերջին ԱՄՆ-ը սահմանափակումներ մտցրեց Գազպրոմբանկի նկատմամբ, որը նախկինում ներառված չէր պատժամիջոցների ցանկում։ Այնուհետև Թուրքիան հայտարարեց, որ պատժամիջոցները բացասաբար են ազդել երկրի վրա և հայտնել, որ բանակցություններ են վարում ԱՄՆ-ի հետ՝ Գազպրոմբանկին բացառություն տրամադրելու ռուսական գազի դիմաց վճարումների համար։ Հունգարիան նման կոչով դիմել է ԱՄՆ-ին։ ՌԴ փոխվարչապետ Ալեքսանդր Նովակն, իր հերթին, հայտնել է, որ Ռուսաստանն աշխատում է պատժամիջոցների սահմանումից հետո գազի դիմաց գազի դիմաց վճարումների ձևի վրա, ինչպես նաև Թուրքիայի հետ։