Իսրայելը հարվածել է Լիբանանին՝ անտեսելով հրադադարը. կան զոհեր

Իսրայելը հարվածներ է հասցրել Լիբանանի հարավին, ինչի հետևանքով զոհվել է 9 մարդ, հայտնում է CNN-ը՝ նկատելով, որ նախորդ շաբաթ ԱՄՆ-ի և Ֆրանսիայի միջնորդությամբ Իսրայելի և Լիբանանի միջև հրադադարի պայմանավորվածություն էր ձեռք բերվել:

Լիբանանի Առողջապահության նախարարությունը հայտնել է, որ զոհերը գրանցվել են Իսրայելի սահմանի մոտ գտնվող Նաբաթիե նահանգում հարվածների հետևանքով. հաղորդվում է երեք վիրավորի մասին:

Երկուշաբթի «Հեզբոլլահ» շարժումը երկու արկ է արձակել Իսրայելի կողմից օկուպացված տարածքների ուղղությամբ՝ պատասխանելով իսրայելական բազմակի հարվածներին, որոնք իրականացվում էին հինգշաբթի օրվանից՝ հրադադարի ուժի մեջ մտնելու հաջորդ օրը:

Սակայն, ինչպես նկատում է CNN-ը,  Իսրայելի և «Հեզբոլլահ»-ի միջև անհանգիստ զինադադարը կարծես թե պահպանվում է, նույնիսկ այն դեպքում, երբ երկու կողմերը միմյանց մեղադրում են հրադադարը խախտելու համար:

ԱՄՆ-ն և Ֆրանսիան երկուսն էլ նախազգուշացրել են Իսրայելին, որ նա խախտել է հրադադարի պայմանները, հայտնում են իսրայելական  Kan և Ynet լրատվականները: Լիբանանում ՄԱԿ-ի խաղաղապահ ուժերի՝ ՅՈՒՆԻՖԻԼ-ի աղբյուրը հայտնել է, որ Իսրայելը խախտել է Լիբանանի հետ հրադադարի համաձայնագիրը «մոտ 100» անգամ՝ անցյալ շաբաթ հրադադարի ուժի մեջ մտնելուց հետո: CNN-ը մեկնաբանություն է խնդրել Իսրայելի պաշտպանության բանակից։