ԱԺ «Պատիվ ունեմ» խմբակցության ղեկավար Արթուր Վանեցյանը, որն արդեն 6 օր գիշերել է Ազատության հրապարակում, տեղեկացրել է, որ իրեն են մոտեցել «Քաղաքացիական պայմանագիր» կուսակցության նախկին անդամներ։
«Այդ մարդիկ գալիս են գիշերային ժամերին, օրինակ, այսօր առավոտյան՝ ժամը 05:43-ի կողմերը, մեկն եկավ դիմակով, հետո տեսա ով է՝ շոկի մեջ էի, ասացի՝ դու ի՞նչ գործ ունես այստեղ, ասաց՝ «զզվել եմ սրանցից»»,-լրագրողների հետ զրույցում հայտարարեց Վանեցյանը:
Պատգամավորը նշեց, որ այդ անձը պետական պաշտոնյա չէ, բայց հանրային դաշտում եղել է իշխանության աջակիցը։
Վանեցյանն անդրադարձել է նաև երեկվա կառավարության նիստի ընթացքում Նիկոլ Փաշինյանի հնչեցրած հայտարարություններին՝ կոչ անելով դրանք լուրջ չընդունել։
«Փաշինյանը, տեսնելով երկրում սկսված այն շարժումը, որն ասում է՝ թույլ չենք տալու, որ Փաշինյանը գնա միակողմանի զիջումների, թույլ չենք տալու, որ Արցախը հանձնվի թշնամուն, այդ հոտառությունն ունի, որ չի կարողանալու այս ալիքի դեմն առնել, դրա համար հիմա փորձում է որոշակի հայտարարություններով այդ ամենը կասեցնել, բայց չի կարողանալու, որովհետև հանրությունն արդեն ճանաչում է նրան, ու որևէ մեկը չի հավատում ու լուրջ չի ընդունում նրան»,-ասել է նա:
Վանեցյանն ուշադրություն է հրավիրել այն հանգամանքի համար, որ Փաշինյանը խոսել է ինչ-որ պայմանական բառակապակցություններով՝ նպատակ ունենալով շեղել մարդկանց, նա այդպես էլ հստակ չի ասել, որ Արցախն Ադրբեջանի կազմում չի լինելու։
0Comments