Բովանդակության ժամանակն է...
1991-ի սեպտեմբերի 2-ին Ստեփանակերտում ընդունվեց «Հռչակագիր Լեռնային Ղարաբաղի Հանրապետության հռչակման մասին» և սկիզբ դրվեց պատմության մեջ անօրինակ հերոսության ու փառահեղ հաղթանակների պատմության: Սիրելի՛ արցախցիներ, Դուք անցել եք պատերազմի ու խաղաղության փորձություններով, Դուք հայի դարավոր իմաստնությանը հավելել եք նպատակին հասնելու հաստատակամությունն ու համառությունը: Այսօր այլևս աշխարհի ոչ մի կետում ոչ ոք չի կասկածում, որ Արցախն ազատ է ու անկախ, նույնիսկ թշնամին: 28 տարիները ապացուցել են, որ հայերը գիտեն միասնականության ու հաղթանակի ուժն ու գինը և կարողանում են իրենց պայքարը մինչև վերջ տանել:
«Հանրապետություն» կուսակցությունը շնորհավորում է բոլորիս համահայկական տոնը, որի սիրտը բաբախում է Արցախում: Վաղ թե ուշ աշխարհը ճանաչելու է Արցախի Հանրապետության անկախությունը:
Աշխարհն իրականում կառավարվում է չգրված օրենքներով, որտեղ առաջին օրենքը հողը՝ հողի վրա ապրելով պահելն է: Հողը Հայրենիք է դառնում, երբ ապրում, պաշտպանում ու կառուցում ես քո երկիրը: Դուք 28 տարի դա ապացուցել եք ամեն օր ու ժամ: Մենք բոլորս ենք դա ապացուցել, աշխարհի բոլոր հայերս՝ Արցախը համարելով միայն հաղթանակի ու սիրո անձեռնմխելի տարածք:
Մաղթում ենք, որ նոր ժամանակներն Արցախում լինեն նույնքան նպատակային ու իմաստավորված՝ հաղթանակի համառությունը զուգորդելով խելամիտ ու հեռանկարային քայլերով: Մեզ բոլորիս պակասում են բովանդակային որոշումները, երբ ստիպված ենք լինում իրավիճակային լուծումներ գտնել անհետաձգելի հարցերին: Վստահ ենք, որ Արցախն իր առաջիկա ընտրություններում ձևավորելու է ժամանակի պահանջներին ու ոգուն արժանի իշխանություն ու հերթական քայլն է անելու, որ 21-րդ դարը մերը լինի: Մենք նահանջի ճանապարհ չունենք, մենք ապրում ենք սահմանամերձ Հայրենիքում ու մեր թիկունքում Եռաբլուրն է:
«Հանրապետություն» կուսակցության քաղաքական խորհուրդ
0Comments