Ի՞նչ կապ կա գրիպի դեմ պատվաստման եւ շաքարախտի միջեւ

^{Գրիպի դեմ պատվաստումը կարող է պաշտպանել օրգանիզմը ոչ միայն շնչառական ուղիների վարակիչ հիվանդությունից, այլեւ ավելի լուրջ հիվանդություններից։}

^{Բանն այն է, որ այնպիսի հիվանդություններ, ինչպիսին են գրիպը, կարմրուկը, խոզուկը, կարող են վնասել ենթաստամոքսային գեղձի ինսուլին արտադրող բետա-բջիջները։ Այն դեպքում, եթե մարդն ունի գենետիկ հակվածություն, այս գործընթացների արդյունքում նրա մոտ կարող է շաքարախտ զարգանալ։ Այս մասին NEWS.am Medicine-ի հետ զրույցում հայտնեց ՀՀ առողջապահության նախարարության երեխաների էնդոկրինոլոգիայի հարցերով խորհրդատու, «Մուրացան» ԲԿ-ի էնդոկրինոլոգիական կլինիկայի ղեկավար Ելենա Աղաջանովան։}

^{«Վիրուսները վնասում են բետա-բջիջները, դրանց ամբողջականությունը խախտվում է։ Իսկ վնասված բջիջները արդեն չեն կարող ինսուլին արտադրել»,- պատմեց փորձագետը։}

^{«Շաքարախտի կլինիկական պատկերն ունենալու համար պետք է խախտված լինի բետա-բջիջների 90 տոկոսը։ Այդ դեպքում ենթաստամոքսային գեղձը չի կարող անհրաժեշտ քանակի ինսուլին արտադրել։ Երեխայի մոտ սկսում են հայտնվել որոշակի բողոքներ՝ նա սկսում է շատ խմել, շատ միզել, նիհարել։ Միջինը 3-4 շաբաթվա ընթացքում նա ջրազրկված վիճակում (ախտանիշները՝ թուլություն, սրտխառնոց, փսխում եւ այն) ընկնում է հիվանդանոց»,- տեղեկացրեց Աղաջանովան։}

^{Սրա հետ կապված՝ նա նշեց պատվաստման կարեւորությունը, որը կարող է օգնել պաշտպանել երեխայի օրգանիզմը վտանգավոր հիվանդություններից։ «Եթե մենք կանխենք դրանց զարգացումը, ապա չի լինի սադրիչ գործոն, որը գենետիկ հակվածության պայմաններում կարող է խթանել այս աուտոիմունային գործընթացը»,- ընդգծեց նա։}