Դավիթաշենցին շրջում էր թմրանյութը գրպանում. Կանեփը չորացրել է ճագարի բնի մեջ

^{Նաիրիի բաժնի համայնքային ոստիկանների ձեռնարկած միջոցառումների շնորհիվ հուլիսի 29-ին, ժամը 19-ին, Զովունի գյուղի 9-րդ փողոցից, թմրանյութ պահելու եւ օգտագործելու կասկածանքով, բերման է ենթարկվել Դավիթաշենի բնակիչ, 45-ամյա մի տղամարդ:}

^{Նրա անձնական խուզարկությամբ տաբատի մի գրպանից հայտնաբերվել է ապակյա տարա՝ դեղնականաչավուն կանեփանման մոտ 20 գրամ զանգվածով, իսկ մյուս գրպանից՝ թղթի մեջ փաթեթավորված դեղնականաչավուն զանգված: Նա հայտնել է, որ հայտնաբերվածը կանեփ է, պատկանում է իրեն եւ գրպանում պահել է իր անձնական օգտագործման համար:}

^{Դավիթաշենցին նաեւ բացատրություն է տվել, որ անձնական օգտագործման համար իր տանը կից հողամասում ցանել եւ աճեցրել է կանեփ:}

^{Նույն օրը նրա հողամասում կատարված զննությամբ հայտնաբերվել է կանեփի չորս թուփ, իսկ ճագարի բնի մեջ՝ չորացված կանեփի երկու բույս:}

^{Ողջ զանգվածը փաթեթավորվել, կնիքվել եւ ուղարկվել է փորձաքննության:}

^{Նախապատրաստվում են նյութեր, գրում է news.am:}