Ռուսաստանի Դաշնության արտգործնախարար Սերգեյ Լավրովը ամերիկացի լրագրող Թակեր Կառլսոնին տված հարցազրույցում խոսել է եվրոպացի քաղաքական գործիչների կողմից ոչ պատշաճ վերաբերմունքի մասին։ Նրա խոսքով՝ Ուկրաինայում հատուկ գործողության մեկնարկից հետո սկսել են խուսափել իրենից։ Որպես օրինակ՝ նախարարը բերել է G20-ի գագաթնաժողովը, որը տեղի է ունեցել նոյեմբերին՝ Ռիո դե Ժանեյրոյում, փոխանցում է Kommersant-ը։
«Ոմանց դուր չի գալիս, երբ ինչ-որ մեկը տեսնում է, որ ամերիկացին կամ եվրոպացին խոսում են ինձ հետ: Եվրոպացիներն ընդհանրապես ինձ տեսնելիս փախչում են։ Նման բան տեղի է ունեցել G20-ի վերջին գագաթնաժողովի ժամանակ։ Նրանք հասուն մարդիկ են, բայց իրենց պահում են երեխաների պես։ Անհավատալի է»,- ասել է Լավրովը։
Նոյեմբերին ԱՄՆ պետքարտուղար Էնթոնի Բլինկենի ներկայացուցիչը հայտարարել է, որ պետքարտուղարը չի նախատեսում միջազգային միջոցառումների ժամանակ շփվել ՌԴ արտգործնախարարի հետ։
«Երբ միջազգային միջոցառումների ժամանակ հանդիպում եմ որևէ ամերիկացու, որին ճանաչում եմ, ոմանք բարևում են և մի քանի բառ փոխանակում», - հավելել է Լավրովը:
Թակեր Կառլսոնի հարցին, թե արդյոք ռուս նախարարը շփվում է ԱՄՆ ներկայիս նախագահ Ջո Բայդենի վարչակազմից որևէ մեկի հետ, Սերգեյ Լավրովը պատասխանել է՝ «չի ցանկանում փչացնել նրանց կարիերան»։
0Comments