Ում ում, բայց ձեր խմբակցությանը խամաճիկային կառավարություն արտահայտությունը շատ ծանոթ է, որովհետև դուք և կողքի խմբակցությունը երկար տարիներ Հայաստանում ձևավորել են խամաճիկային կառավարություն։
Այս մասին ԱԺ-ում կառավարության հետ հարցուպատասխանի ժամանակ, պատասխանելով «Հայաստան» դաշինքի պատգամավոր Արթուր Խաչատրյանի հարցին՝ արդյո՞ք Ադրբեջանի խամաճիկային կառավարությունն է երաշխավորելու ՀՀ-ի անկախությունն ու ինքնիշխանությունը, ասաց վարչապետ Նիկոլ Փաշինյանը։
«Այդ կառավարությունը ո՛չ ինքնուրույն շնչել է, ո՛չ արտաշնչել է, ո՛չ հազացել է, ո՛չ փռշտացել է, և հետևաբար կարծում եմ՝ դուք գիտեք, թե ինչի մասին եք խոսում։ Ես հիմա չեմ էլ ուզում խոսել ԼՂ մեր գործընկերների վերաբերյալ, որովհետև այդ թվում նաև դուք եք նրանց դրել հարվածի տակ։
Ես ուզում եմ հիշեցնել, թե դուք երկու խմբակցությունով ինչպես էիք տոնում, երբ ԼՂ-ում իշխանության փոփոխություն էր տեղի ունենում։ Ասում էիք՝ ԼՂ ժողովուրդը ձեռքը խփել է սեղանին, վերջապես ձևավորել է ազգային կառավարություն, դուք և կողքի խմբակցության ղեկավարները շնորհավորում էիք այդ փոփոխության կապակցությամբ, ասում էիք եկել է ԼՂ փրկության ժամը։
Թերևս այն, ինչ տեղի ունեցավ, ձեր ծրագրերի մեջ էր մտնում։ Ակնհայտ է, թե ինչ է եղել այդ պլանի մեջ, և փաստորեն դուք տեղյակ եք եղել դրա մասին, այդ ամբիոնից ասում էիք շուտով կոչնակն է հնչելու, տեսեք ինչ է լինելու։ Եղավ այն, ինչ դուք ուզում և պլանավորում էիք, ու չեղավ այն, ինչ դուք ուզում և պլանավորում էիք, որովհետև ձեր պլանն այն էր, որ ՀՀ-ն կներքաշվի պատերազմի մեջ, որի արդյունքում ԼՂ մեր հայրենակիցները բռնի տեղահանվելուց Երևան գալու հնարավորություն չեն ունենա, կգնան Բոստոն, Փարիզ, Լոս Անջելես՝ ուժեղացնելու ՀՅԴ-ի նոսրացող և զրոյացող շարքերը»,- ասաց Փաշինյանը։
Անդրադառնալով Արթուր Խաչատրյանի հնչեցրած խամաճիկային կառավարություն ձևակերպմանը, Փաշինյանն ասաց․
«Մարիոնետային կառավարությունները ձեր կուսակցությունների կառավարություններն են եղել, որոնք երբեք սեփական ժողովրդի կողմից չեն ընտրվել։ Ոչ դուք եք որոշում Հայաստանում իշխանափոխություն լինի, թե ոչ, ոչ էլ ուրիշ որևէ մեկը, դա որոշում է ՀՀ ժողովուրդը, եթե ժողովուրդը որոշի, այսօր երեկոյան էլ կարող է իշխանափոխություն անի ու ոչ մեկին չի հարցնի։
ՀՀ ժողովուրդը ձեզ հետ այդ իշխանափոխությունը արել է ու ամեն օր էլ անում է։ Դուք երբեք ինքնուրույն քաղաքականություն չեք ունեցել, չեք էլ հասկացել, թե ինչ քաղաքականություն եք վարում»։
0Comments