Հայրենական մեծ պատերազմի հայ վետերանները ներկա կլինեն ՌԴ–ի տոնակատարություններին. Կոպիրկին

Հայրենական մեծ պատերազմի Հայաստանի վետերանները Մոսկվայում և Սանկտ Պետերբուրգում ներկա կգտնվեն Հաղթանակի 80-ամյակին նվիրված հանդիսավոր միջոցառումներին: Այս մասին այսօր լրագրողներին հայտնել է Հայաստանում ՌԴ դեսպան Սերգեյ Կոպիրկինը։

Հայաստանում նույնպես նախատեսվում են լայնածավալ միջոցառումներ, այդ թվում՝ արդեն ավանդական դարձած «Հիշողության այգին» և «Անմահ գունդը»:

«Մենք անում ենք ամեն ինչ Հայաստանում այդ օրն արժանապատվորեն նշելու համար և շատ ենք կարևորում այն փոխգործակցությունը, որն առկա է Հայրենական մեծ պատերազմի և Խորհրդային Միության ժողովուրդների սխրանքի մասին հիշողության պահպանման հարցում», - ասել է ռուս դիվանագետը:

Նրա խոսքով՝ հոբելյանական օրվա միջոցառումների ծրագիրը շատ հագեցած է։ Այս առումով ՌԴ դեսպանատունը համակարգում է իր գործողությունները հայկական կողմի հետ։

Ավելի վաղ, մարշալ Բաղրամյանի անվան Հայաստանի վետերանների միավորման նախագահ Սիմոն Եսայանը Sputnik Արմենիային հայտնել էր, որ պատերազմի 2 վետերան կմեկնի Մոսկվա` մասնակցելու Հայրենական մեծ պատերազմում հաղթանակի 80-ամյակի տոնական միջոցառումներին։ Ընդհանուր առմամբ, Հայաստանում ապրում է Հայրենական մեծ պատերազմի 34 վետերան։ Նրանց մեծ մասը 100 և ավելի տարեկան է։