ՌԴ նախագահ Վլադիմիր Պուտինը ԱԳ նախարար Սերգեյ Լավրովին պարգևատրել է ռուսական բարձրագույն պետական շքանշանով։ Համապատասխան փաստաթուղթը հրապարակվել է իրավական տեղեկատվության պաշտոնական պորտալում։
ՌԴ արտաքին գործերի նախարարության ղեկավարը պարգևատրվել է «Հայրենիքին մատուցած ակնառու ծառայությունների, Ռուսաստանի Դաշնության արտաքին քաղաքականության զարգացման և իրականացման գործում ներդրած մեծ ավանդի և երկարամյա բեղմնավոր պետական գործունեության համար», նշվում է հրամանագրում։
Լավրովը այսօր դառնում է 75 տարեկան։ Նա գրեթե 22 տարի աշխատում է որպես արտաքին գործերի նախարարության ղեկավար՝ զիջելով միայն Խորհրդային Միության նախարար Անդրեյ Գրոմիկոյին (28 տարի պաշտոնավարում) և կայսերական կանցլեր Ալեքսանդր Գորչակովին (26 տարի): Լավրովը Ռուսաստանի կառավարությունում ավելի երկար է աշխատել, քան մյուս նախարարները։
Լավրովը ԱԳՆ համակարգում աշխատում է 1972 թվականից: 1992-1994 թվականներին եղել է Ռուսաստանի արտաքին գործերի փոխնախարար, իսկ 1994-2004 թվականներին՝ ՄԱԿ-ում Ռուսաստանի Դաշնության մշտական ներկայացուցիչը։
0Comments