«5 հարց՝ Արմեն Աշոտյանին» հեռակա զրույցի շրջանակներում ՀՀԿ փոխնախագահ, քաղբանտարկյալ Արմեն Աշոտյանը դարձյալ պատասխանել է քաղաքացիների հարցերին, փոխանցում է 168.am-ը։:
Հարց 4-րդ
«Քաղաքական շրջանակներ կան, որ նոր թափով են ֆռացնում «Սերժն ա բերել Նիկոլին» թեզը։ Գիտեմ, որ շատ եք այս թեմային անդրադարձել, բայց խնդրում եմ, կրկին մեկնաբանեք սա»:
Արմեն Աշոտյանը տնային կալանքի կրման վայրից պատասխանել է.
«Իրավացի եք, այդ ցնդաբանությանը, որը որոշ շրջանակների բարոյական սնանկության և/կամ անբուժելի փոքրոգության արգասիք է, որ նրանց կողմից գցվում է հանրային դաշտ, մի քանի անգամ անդրադարձել եմ։ Որոշ դիտարկումներ հավելեմ միայն։
Երբ ոմանք արդարանում են, թե 2018-ին փողոց են դուրս եկել, որովհետև «Սերժը խաբեց և երրորդ անգամ առաջադրվեց», դառը ժպիտ է առաջանում ինձ մոտ։ Լավ, դիցուք, 2014-ին նախագահի խոսքը սխալ եք ընկալել և ձեզ խաբված եք զգացել։ Բա հիմա՞, երբ 7 տարի է, ինչ Նիկոլը ձեզ իրոք, ուղղակի և անթաքույց խաբում է, իշխանափոխության «զադերժկեն ինչո՞ւմ ա»։
Երբ ուրիշներն էլ ռետրոսպեկտիվ փիլիսոփայում են, թե բա՝ «մայիսի 8-ին էլ չընտրեիք, գնայինք ընտրության, և Նիկոլը վարչապետ չէր դառնա», մի քանի շերտով համ իրենք են խճճվում, համ ձեզ խճճում։ Էդ Նիկոլին 2018-ի գարնանը հնարավոր արտահերթ ընտրություններին չէին ընտրելու, հա՞։ Էյֆորիան անցած կլիներ, հա՞։ Աչքներդ կբացվեր, հա՞։ Լո՞ւրջ։
Բա 2018-ի սեպտեմբերի 23-ին էլի Սե՞րժը ստիպեց ձեզ Երևանում 81% տալ «Իմ քայլը» դաշինքին։ Բա 2018-ի հոկտեմբերի 2-ին էլի Սե՞րժը ստիպեց ձեզ արձագանքել Նիկոլին, պաշարել Ազգային Ժողովը և ոչնչացնել նրա բացարձակ իշխանությանը խոչընդոտող վերջին կառույցը։
Իսկ նույն 2018-ի դեկտեմբերի ԱԺ արտահերթին էլի Սե՞րժը ստիպեց ձեզ գնալ ու 70.4 %-ով ընտրել Նիկոլին։
Ոմանք էլ, անտեսելով բոլոր քաղաքագիտական օրինաչափությունները, ասում են՝ «Բա Վրաստանում ո՞նց պահեցին իշխանությունը»: Երբ որոշ շրջանակներ փորձում են զուգահեռներ անցկացնել այսօրվա Վրաստանի և 2018-ի Հայաստանի միջև, հիշեցնեմ, որ Իվանիշվիլին մնաց իշխանության նաև այն պատճառով, որ ի տարբերություն 2018-ի Հայաստանի, նրան իշխանազրկելու գեոպոլիտիկ կոնսենսուս չկար։ Հակառակը, Մոսկվան անթաքույց և տեսանելի, ուղիղ տեքստով (և ոչ միայն տեքստով) նախընտրական փուլում սատարում էր և հիմա էլ սատարում է Վրաստանի իշխանություններին, այդ թվում՝ տնտեսական գործիքակազմով։
Սա կրկին շեշտում եմ «հիշողության կորուստ» ունեցողների համար։ Իսկ ամենակարևորը՝ վրաց ժողովուրդը, ի տարբերություն 2018-ի Հայաստանի, չկերավ այն կտերը, ստերը, մանիպուլյացիաները, որոնք համառորեն հրամցվում էին «առաջադեմ» շրջանակների կողմից»։
0Comments