Երբ որդին իրավունք չունի մոտենալ հորը

 ՀՀ քննչական կոմիտեի Արմավիրի մարզային քննչական վարչության Վաղարշապատի քննչական բաժնում ձեռնարկված քննչական գործողությունների արդյունքում պարզվել են Արմավիրի մարզի բնակչի կողմից հոր նկատմամբ բռնություն գործադրելու դեպքի հանգամանքները: Մեղադրանք է առաջադրվել Արմավիրի մարզի բնակչին:

Այս մասին «Արմենպրես»-ին տեղեկացրին ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից:

Քննությամբ ձեռք բերված տվյալների համաձայն՝ 2018 թ. նոյեմբերի 20-ին ժամը 11:30-ին Արմավիրի մարզի Ծաղկունք գյուղի տներից մեկում կենցաղային հարցերի շուրջ ծագած վիճաբանության ժամանակ նույն գյուղի բնակիչը՝ ծնված 1968թ., բռնություն է գործադրել հոր նկատմամբ:
Վերոնշյալի հիման վրա ՀՀ ոստիկանության Վաղարշապատի բաժնի ԱԳ և ԸԲԿ բաժանմունքի ծառայողների կողմից 51-ամյա տղամարդու նկատմամբ կայացվել է ընտանիքում բռնություն գործադրած անձի վերաբերյալ անհետաձգելի միջամտություն կիրառելու մասին որոշում՝ «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» ՀՀ օրենքի 7-րդ հոդվածի 3-րդ մասի 1-ին կետով, որի հիման վրա վերջինիս արգելվել է 20 օր ժամանակով մոտենալ բռնության ենթարկված հորը:
Սակայն Ծաղկունք գյուղի 51-ամյա բնակիչը, խախտելով անհետաձգելի միջամտության որոշման պահանջները, նույն օրը՝ ժամը 19:25-ի սահմաններում, գնացել է հոր տուն և կրկին բռնություն գործադրել նրա նկատմամբ՝ աթոռով հարվածելով վերջինիս գլխին:
51-ամյա տղամարդու նկատմամբ ևս մեկ անգամ կայացվել է անհետաձգելի միջամտություն կիրառելու մասին որոշում՝ վերջինիս արգելելով 20 օր ժամանակով 100 մետր հեռավորությունից ավելի մոտենալ բռնության ենթարկված հորը:
Ձեռք բերված ապացույցների համակցությամբ՝ Ծաղկունք գյուղի 51-ամյա բնակչին մեղադրանք է առաջադրվել՝ ՀՀ քրեական օրենսգրքի 353.1-րդ հոդվածի 1-ին մասով: Նրա նկատմամբ որպես խափանման միջոց է ընտրվել ստորագրություն չհեռանալու մասին:
Նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել դատարան:
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ,

 քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` 

օրինական ուժի մեջ մտած դատավճռով: