YouTube տեսահոսթինգային ծառայությունը կսկսի գովազդներ տեղադրել հարթակում հրապարակված բոլոր տեսանյութերում: Համապատասխան տեղեկությունը հրապարակվել է ընկերության պաշտոնական կայքի «Օգտագործման պայմաններ» բաժնում:
Նորամուծությունն ուժի մեջ կմտնի հունիսի 1-ից:
Ներկայում գովազդները տեղադրված են այն տեսանյութերում, որոնք հրապարակած օգտատերերը միացած են YouTube-ի «գործընկերության ծրագրին» (YouTube Partner Program): Վերջինիս միանալու համար պետք է բավարարել երկու նախապայման՝ յութուբյան ալիքի բաժանորդների թիվը պետք է լինի առնվազն 1000, իսկ տարեկան դիտումների ընդհանուր ժամանակը՝ 4000 ժամ:
Բացի այդ, Միացյալ Նահանգներից դուրս բնակվող բովանդակություն ստեղծողների եկամուտները կսկսեն համարվել ռոյալթի (ամենամսյա վճարի տեսքով ֆինանսական փոխանցում-խմբ.) և կհարկվեն ԱՄՆ օրենսդրության համաձայն: Օգտատերը պետք է ընկերությանը ներկայացնի այնպիսի տեղեկություններ, ինչպիսիք են՝ հարկ վճարողի նույնականացման համարը, իրավաբանական անձի և ալիքի անվանումները: Այս տեղեկատվությունը չտրամադրելու դեպքում ընկերությունը կարող է եկամտի մինչև 24 տոկոս պահումներ անել:
0Comments