Եվրասիական տնտեսական հանձնաժողովի կոլեգիայի նախագահ Տիգրան Սարգսյանը ՏԱՍՍ-ի հետ զրույցում անդրադարձել է հարցին՝ ԵԱՏՄ-ում ե՞րբ կարող է չեղարկվել ռոումինգը, ի՞նչ է արվում այդ ուղղությամբ:
«Մենք դիմել ենք ՌԴ փոխվարչապետին՝ խնդրելով այս հարցի քննարկումները սկսել, որպեսզի ինչպես Ռուսաստանում, այնպես էլ ողջ եվրասիական տարածաշրջանում, ռոումինգը չեղարկվի: Այժմ մենք պետք է բանակցություններ սկսենք բոլոր օպերատորների հետ, որ գործունեություն են ծավալում 5 երկրների տարածքում, որպեսզի նրանք ՌԴ օրինակով համաձայնության գան և ԵԱՏՄ տարածքում ռոումինգը չեղարկեն: Մեր եվրոպացի գործընկերները նույն կերպ վարվել են ԵՄ տարածքում՝ դա կարևոր քայլ համարելով սահմաններ չունեցող տարածության ստեղծման ճանապարհին»,- ասել է նա:
Սարգսյանը նշել է, որ առաջին փուլում պետք է հասկանալ՝ ինչ մեթոդով են որոշվելու ծառայությունների սակագները՝ ռոումինգի չեղարկման դեպքում, ազգային կառավարությունները պետք է բիզնեսի հետ երկխոսություն ունենան, քանի որ ակնհայտ է, որ բիզնեսն ինչ-որ տեղ կարող է հակադրվել՝ իր եկամուտները չկորցնելու համար:
«Մենք արդեն նախաձեռնել ենք այս երկխոսությունը, այժմ մեզ մոտ բանակցային գործընթաց է մեր ռուս գործընկերների հետ: Կա փոխադարձ հասկացվածություն: Պետք է նշել, որ մեր հանձնաժողովի արած աշխատանքի շնորհիվ ԵԱՏՄ տարածքում ռոումինգի սակագինն արդեն իսկ մի քանի անգամ նվազել է, և դա զգալի առաջընթաց է: Այժմ մենք պետք է օպերատորներին հավաքենք բանակցությունների սեղանի շուրջ, որպեսզի ռոումինգի չեղարկման համաձայնեցված որոշում մշակենք»,- ասել է ԵՏՀ կոլեգիայի նախագահը:
0Comments