Քոչարյանին ազատ արձակելու որոշման դեմ դատախազության ներկայացրած բողոքը մակագրվել է դատավոր Ա. Դանիելյանին

^{ՀՀ երկրորդ նախագահ Ռոբերտ Քոչարյանի գործով դատախազության բողոքները մակագրվել են Վերաքննիչ քրեական դատարանի դատավոր Արմեն Դանիելյանին: Այս տեղեկությունը NEWS.am–ի հետ զրույցում հաստատեցին գլխավոր դատախազությունից։}

^{Խոսքը Ռոբերտ Քոչարյանի խափանման միջոց կալանավորումն անձնական երաշխավորությամբ փոխելու, նրա և մյուսների գործի վարույթը կասեցնելու և Սահմանադրական դատարան դիմելու առաջին ատյանի դատարանի որոշումների դեմ դատախազության ներկայացրած բողոքների մասին է:}

^{Հիշեցնենք, որ Երևանի ընդհանուր իրավասության դատարանի դատավոր Դավիթ Գրիգորյանը մայիսի 18-ին, քննելով Քոչարյանի խափանման միջոցի հարցը, որոշել էր նրան ազատել կալանքից Արցախի Հանրապետության նախկին և ներկա նախագահներ Արկադի Ղուկասյանի և  Բակո Սահակյանի անձնական երաշխավորությամբ:}

^{Երկու օր անց՝ մայիսի 20-ին, դատարանը որոշել էր կասեցնել Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի գործի վարույթն ու այն ուղարկել Սահմանադրական դատարան` պարզելու համար այս գործով կիրառման ենթակա ՀՀ քրեական օրենսգրքի 300.1-րդ հոդվածի 1-ին մասի և դրա հետ փոխկապակցված ՀՀ քրեական օրենսգրքի 300-րդ հոդվածի 1-ին մասի (մինչև 2009 թվականի մարտի 20-ին ընդունված ՀՕ-53-Ն օրենքի ուժի մեջ գտնվելը գործող խմբագրությամբ) համապատասխանությունը ՀՀ Սահմանադրության պահանջներին:}

^{Հիշյալ որոշումները դատախազությունը բողոքարկել էր Վերաքննիչ դատարան։}

^{Տուժող կողմը դժգոհել էր, որ դատավոր Դավիթ Գրիգորյանը որոշման կայացումից հետո գործի նյութերն ուղարկել է Սահմանադրական դատարան ինչի պայմաններում Վերաքննիչ դատարանը հնարավորություն չուներ որևէ գործողություն կատարել:}

^{Դավիթ Գրիգորյանըն էլ երեկ Սահմանադրական դատարանից պահանջել է գործի նյութերը`պատճենահանելու և դրանք Վերաքննիչ դատարան ուղարկելու համար:}

^{Երեկ երեկոյան Վերաքննիչ դատարանը ստացել է նյութերը, որից հետո գործը մակագրվել է դատավոր Արմեն Դանիելյանին:}