Քաղաքականությունը փոփոխություններ բերելու գործիք է միայն. Զարուհի Բաթոյան

^{Երեխաների պաշտպանության օրվա կապակցությամբ ՀՀ աշխատանքի եւ սոցիալական հարցերի նախարար Զարուհի Բաթոյանն ընդունել է Հայաստանի պետական մանկավարժական համալսարանի հիմնական դպրոցի աշակերտ Էդուարդ Պողոսյանին, ով նախարարին ուղղված նամակում նշել էր, որ դա իր երեզանքներից մեկն է:}

^{«Ես երկար տարիներ եղել եմ մանկապատանեկան ամսագրի գլխավոր խմբագիր, աշխատել եմ երեխաների հետ: Ինձ համար շատ կարեւոր է, որպեսզի յուրաքանչյուր երեխայի ձայնը, կարծիքը, տեսակետը լսելի լինի մեծերի համար: Ես շատ ուրախ եմ, որ այսօր հյուրընկալել եմ քեզ նման խելացի, համարձակ, պրպտող, իր հարցերի պատասխանները փնտրող երիտասարդի: Ես համոզված եմ, որ սա մեր առաջին, սակայն ոչ վերջին հանդիպումն է լինելու»,- ասել է նախարարը:}

^{Ապագա լրագրող Էդուարդի հետ նախարար Բաթոյանի հանդիպումը վերածվել է յուրօրինակ հարցազրույցի. Էդուարդը բազմաթիվ հարցեր ուներ նախարարին, նախարարը՝ դպրոցականին:}

^{«Ինձ համար շատ կարեւոր էր այս հանդիպումը, որովհետեւ մենք շատ նմանություններ ունենք: Դուք եւս մասնագիտությամբ լրագրող եք, իսկ ես երազում եմ քաղաքականությամբ զբաղվելու մասին»,- ասել է Էդուարդը:}

^{Նախարարը շնորհակալություն է հայտնել  Էդուրադին իր էջին ուղղված կարեւոր հարցադրումների համար ու մի քանի ընկերական խորհուրդ տվել.}

^{«Խոսքի ազատությունը ժողովրդավարական հասարակության ամենամեծ ձեռքբերումներից է, իսկ լրագրությունը՝ ամենահզոր գործիքներից մեկը՝ մարդկանց կյանքում փոփոխություններ իրակնացնելու համար: Ճիշտ նկատեցիր, որ ես նույնպես սկսել եմ լրագրությունից, բայց քաղաքականությունն ու պաշտոնն ինձ համար երբեք ինքնանպատակ չեն եղել: Ես միշտ մտածել եմ, որ դրանք եւս փոփոխություններ բերելու, բարեփոխումներ իրականացնելու միջոց են միայն: Ես շատ կուզենամ, որ դու՝ լինես լրագրության, թե քաղաքականության մեջ, միշտ հիշես, որ կարեւորը մարդն է»,- ասել է նախարարը:}

^{Հանդիպման ավարտին Էդուարդը շրջել է նախարարությունում, ծանոթացել տարբեր վարչությունների աշխատանքներին, գործառույթներին:}

^{Իր ապագան Էդուրադը պատկերացնում է օրենսդիր կամ գործադիր մարմիններում, որոշումների կայացման գործընթացներում:}