Ես խոնարհվում եմ ձեր առջև, սիրելի արցախցի քույրեր և եղբայրներ, ամոթ եմ զգում ձեր առջև: Այս մասին, Սուրբ Խաչ եկեղեցում դիմելով արցախցիներին, ասաց Բագրատ Սրբազանը:
«Ամոթ եմ զգում, որ չեմ կարողացել այն հերոսական կյանքին, որ դուք եք դրել, տեր կանգնել: Ամոթ եմ զգում, որ այստեղ՝ Երևանի սրտում եմ ձեզ հանդիպում, մինչդեռ մեզ համար մի մեծ տոնախմբություն կդառնար Ստեփանակերտում Շուշիում, Գանձասարում և Ամարասում միասին հանդիպեինք»,- ասաց նա:
Սրբազանը նշեց, որ այդուհանդերձ այս ցավը մեզ չպետք է ընկճի, այս ողբերգությունը մեզ չպետք է ոչնչացնի:
«Հակառակը՝ ձեր նկարագրին հարազատ, ձեր համառությանը, կամքին, հերոսական կյանքին, նկարագրին հարազատ, բոլորով միասին պետք է վերականգնենք մեր կյանքը և մեր տունը: Ինչ ուզում են թող ասեն, կասեն՝ անհնար, կասեն՝ պաթոս, կապ չունի, իրականությունը դա է, մենք ենք ստեղծելու այդ իրականությունը: Մեզ համար չեն կարող իրականություն ստեղծել ու պարտադրել այդպես ապրել: Անհնար ոչ մի բան չկա այս աշխարհի տակ, չկա նրա համար, ով հավատում է, չկա նրա համար, ով գործում է»,- շեշտեց նա:
Սրբազանը նշեց, որ հավատում է՝ Աստծո զորությամբ, մեր նահատակների կանչով, իրենց ներկայությամբ մենք պետք է վերադառնանք, ուրիշ ճանապարհ չունենք, ուրացումը մեր կյանքում տեղ չպետք է ունենա և այդ ուրացումով ուրացողների կյանքն էլ պետք է դժոխք դառնա:
0Comments