Ցմահ դատապարտյալը նոր իշխանություններից օրենքի գերակայություն է ակնկալում. ՏԵՍԱՆՅՈՒԹ

Արմավիրի մարզի ընդհանուր իրավասության դատարանի Էջմիածնի նստավայրում այսօր նշանակված էր ցմահ դատապարտյալ Աշոտ Մանուկյանին պայմանական վաղաժամկետ ազատելու հարցով դատական նիստ։ Աշոտ Մանուկյանը բերվել էր դատարան: Լրագրողների հարցին, թե ի՞նչ է ականկալում դատարանից, ցմահ դատապարտյալն ասաց. «Նոր իշխանություններից ակնկալում եմ օրենքի գերակայություն, օրենքի կիրառում»: Դատապարտյալի գործով նիստին հետևում էր նաև հասարակական գործիչ Անդրիաս Ղուկասյանը։

Նշենք, որ այսօրվա դատական նիստին չէր ներկայացել մեղադրող դատախազը։ Նրա ներկայությունը դատարանում ապահովելու նպատակով  այսօրվա դատական նիստը հետաձգվեց և նշանակվեց օգոստոսի 20–ին, ժամը 14։00–ին։

Նշենք, որ 23 տարի անազատության մեջ գտնվող Մանուկյանի վաղաժամկետ ազատման վերաբերյալ Արդարադատության նախարարության քրեակատարողական ծառայությունը բացասական, իսկ պրոբացիոն ծառայությունը դրական եզրակացություն է տվել: Նման պայմաններում «Արմավիր» քրեակատարողական հիմնարկը, որում պահվում է դատապարտյալը, միջնորդագիր է տարել դատարան՝ վաղաժամկետ ազատման վերաբերյալ որոշում կայացնելու համար: Աշոտ Մանուկյանը 23 տարի առաջ մեղադրվել է երեք զինծառայողի սպանության համար և գնդակահարության դատապարտվել, սակայն դատավճիռն ի կատար չի ածվել, և 2003 թվականին, ինչպես գնդակահարության դատապարտված այլ անձանց, նրա պատիժը ևս փոխարինվել է ցմահ ազատազրկմամբ: 20 տարեկանում հանցանք կատարած Մանուկյանն այժմ 43 տարեկան է: Ինչպես քրեակատարողական ծառայությունն, այնպես էլ պրոբացիոն ծառայությունն արձանագրել են, որ Աշոտ Մանուկյանը պատժի կրման ընթացքում դրական վարքագիծ է դրսևորել, քրեական ենթամշակույթի նկատմամբ բացասական վերաբերմունք ունի, ակտիվորեն մասնակցել է վերասոցիալականացման միջոցառումներին: Սակայն, քրեակատարողական ծառայությունը գտել է, որ Մանուկյանի հանցանք կատարելու հավականությունը բարձր է: Պրոբացիոն ծառայությունն էլ թեև դատապարտյալի հանցանք կատարելու հավանականությունը ցածր է գնահատել ու նպատակահարմար գտել նրա վաղաժամկետ ազատումը`հանդես է եկել առաջարկությամբ, որը նրա պաշտպան Միհրան Պողոսյանը ոչ իրավաչափ է համարում: Մասնավորապես`ծառայությունն առաջարկել է պայմանական վաղաժամկետ արձակման հարցը քննարկելիս դատապարտյալի նկատմամբ նշանակել դատահոգեբանական փորձաքննություն՝ պարզելու նրա հոգեբանական բնութագիրը, որն, ըստ պրոբացիոն ծառայության, կարող է էաական ազդեցություն ունենալ նրա վերասոցիալականացման գործընթացի վրա:

Ի դեպ՝ Մանուկյանի վաղաժամկետ ազատման դեմ տուժողների հարազատներն առաջարկություն չունեն: