Հայաստանի երկրորդ նախագահ Ռոբերտ Քոչարյանի որդու՝ «Հայաստան» ընդդիմադիր խմբակցության պատգամավոր Լևոն Քոչարյանի վարքը քաղաքական հետևանքներ է ունենալու։ Այս մասին մայիսի 19-ին Ազգային ժողովում լրագրողների հետ հանդիպմանն ասել է խորհրդարանի խոսնակ Ալեն Սիմոնյանը։

«Այն, ինչ իրեն թույլ է տվել պարոն Քոչարյանի կրտսեր որդին, պետք է ունենա և ունենալու է քաղաքական հետևանքներ։ Եվ թող որևէ մեկը դրանում չկասկածի»,- ասել է Սիմոնյանը։

Նա նաև պատասխանել է Լևոն Քոչարյանի՝ իրեն խորհրդարանի ամբիոնից գցելու սպառնալիքներին։

«Մենք նախ պետք է հասկանանք՝ ով է նա ընդհանրապես։ Դե, բացի նրանից, որ նա հայտնի երգչուհու ամուսինն է և մարդասպանի ու պետության չընտրված ղեկավարի որդին։ Ո՞վ է նա ընդհանրապես, ուզում եմ հասկանալ։ Ո՞վ է նա։ Նա ոչ մեկն է։ Նրա ամենամեծ անձնական ձեռքբերումը հայտնի երգչուհու ամուսինը լինելն է»,- հայտարարել է ԱԺ նախագահը։

Սիմոնյանը խոստովանել է, որ ինքը բազմաթիվ սուր ելույթներ և հայտարարություններ ունի, սակայն կա մի սահման, որը նա երբեք չի անցնում։