Եվրամիության պետությունների և կառավարությունների ղեկավարները հաստատել են առաջիկա հինգ տարում ԵՄ ղեկավար պաշտոններում նշանակումները։ Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին X-ում հայտնել է Եվրոպական խորհրդի հեռացող ղեկավար Շառլ Միշելը՝ ամփոփելով Բրյուսելում ԵՄ գագաթնաժողովի արդյունքները:

Նրա խոսքով՝ Ուրսուլա ֆոն դեր Լայենը վերանշանակվել է Եվրահանձնաժողովի նախագահ, Պորտուգալիայի նախկին վարչապետ Անտոնիու Կոշտան դարձել է Եվրոպական խորհրդի ղեկավար, իսկ Էստոնիայի վարչապետ Կայա Կալլասը՝ ԵՄ դիվանագիտության ղեկավար։

Այժմ Եվրախորհրդարանը հուլիսին կայանալիք լիագումար նիստում պետք է քվեարկի Եվրոպական խորհրդի կողմից նշանակված թեկնածուների օգտին, որից հետո որոշումները կմտնեն ուժի մեջ։ Կալլասը կարող է իր պարտականություններին անցնել հոկտեմբերին, Կոշտան՝ դեկտեմբերին, իսկ ֆոն դեր Լայենն արդեն սեպտեմբերին կներկայացնի Եվրահանձնաժողովի նոր կազմը: 

Հայաստանի առանձին շրջաններում հունիսի 29-ին կեսօրից հետո սպասվում է անձրեւ եւ ամպրոպ, առանձին վայրերում սպասվում է կարկուտ: Ամպրոպի ժամանակ սպասվում է քամու ուժգնացում՝ հարավ-արևմտյան՝ 18-23 մ/վրկ արագությամբ։ Օդի ջերմաստիճանն առաջիկա 3 օրերին ցերեկը աստիճանաբար կնվազի մի քանի աստիճանով։

«Հայգոսհիդրոմետ»-ի հաղորդմամբ՝ Երևանում երեկոյան ժամերին սպասվում է կարճատև անձրև և ամպրոպ, ամպրոպի ժամանակ՝ քամու ուժգնացում՝ 16-20 մ/վ: Առաջիկա գիշերը մայրաքաղաքում կլինի +15+17, վաղը ցերեկը՝ +28+30։

Օդի ջերմաստիճանը մարզերում.

Շիրակում՝ գիշերը՝ +6+11, ցերեկը՝ +20+25,

Կոտայքի լեռներ՝ գիշերը՝ +6+10, ցերեկը՝ +18+21,

Կոտայքի նախալեռներ՝ գիշերը՝ +13+15, ցերեկը՝ +25+28,

Սևանա լճի ավազանը՝ գիշերը՝ +8+11, ցերեկը՝ +16+20,

Լոռի՝ գիշերը՝ +7+12, ցերեկը՝ +16+20,

Տավուշ՝ գիշերը՝ +11+16, ցերեկը՝ +20+24,

Արագածոտնի լեռներում՝ գիշերը՝ +6+11, ցերեկը՝ +18+21,

Արագածոտնի նախալեռներ՝ գիշերը՝ +13+16, ցերեկը՝ +24+29,

Արարատ՝ գիշերը՝ +16+18, ցերեկը՝ +30+32,

Արմավիր՝ գիշերը՝ +14+16, ցերեկը՝ +30+32,

Վայոց ձորի լեռներում՝ գիշերը՝ +8+10, ցերեկը՝ +19+21,

Վայոց ձորի նախալեռներ՝ գիշերը՝ +16+18, ցերեկը՝ +29+32,

Սյունիքի հովիտներում՝ գիշերը՝ +19+21, ցերեկը՝ +22+25,

Սյունիքի նախալեռներ՝ գիշերը՝ +12+14, ցերեկը՝ +15+18:

Գլխավոր դատախազությունը փորձում է կյանքի կոչել իշխանությունների՝ Հայաստանյայց Առաքելական Սուրբ Եկեղեցուն պատկանող գույքերն ուսումնասիրելու և դրանք պետականացնելու հայտարարությունները:

NEWS.am-ին հայտնի դարձավ, որ դատախազության կողմից նախաձեռնվել է քրեական վարույթ և պետության շահերի պաշտպանության հայց է հարուցվել պետական սեփականություն հանդիսացող եկեղեցին Հայաստանյայց Առաքելական Սուրբ Եկեղեցուն նվիրելու կապակցությամբ:

Մասնավորապես գլխավոր դատախազությունը պահանջում է անվավեր ճանաչել Արագածոտնի մարզի Ապարանի տարածաշրջանի Եղիպատրուշ գյուղում գտնվող 13-րդ դարի առաջին քառորդին կառուցված Ս. Աստվածածին եկեղեցու նվիրատվությունը Հայաստանյայց Առաքելական Սուրբ Եկեղեցուն:

Այս կապակցությամբ դատախազությունը այս տարվա փետրվարին դիմել է ՀՀ վարչական դատարան՝ ընդդեմ Ապարան համայնքի ղեկավարի՝  դատարանից խնդրելով անվավեր ճանաչել Արագածոտնի մարզի Ապարան համայնքի ղեկավարի 2019թ․ ապրիլի 1-ի թիվ 131-Ա որոշումը և որպես հետևանք վերացնել Եղիպատրուշ բնակավայրի 8-րդ փողոցի 1-ին նրբանցքի թիվ 2 հասցեի նկատմամբ Եղիպատրուշ համայնքի անվամբ սեփականության իրավունքի գրանցումը, ինչպես նաև 2020թ․ հունիսի 9-ի անշարժ գույքի նվիրատվության պայմանագիրը և պայմանագրից ծագող Հայաստանյայց Առաքելական Սուրբ Եկեղեցու  սեփականության իրավունքի գրանցումը և գրանցամատյանի գրառումը:

Խոսքը 1208 թվականին Վաչե Վաչուտյան իշխանի նախաձեռնությամբ և ճարտարապետ Մխիթար Օշականցու կողմից կառուցված Սուրբ Աստվածածին եկեղեցու մասին է, որը ճանաչվել է համայնքի սեփականությունը և հանձնվել ՀԱԵ-ին:

Համաձայն Ապարան համայնքի ղեկավար Կարեն Եղիազարյանի  2019 թվականի ապրիլի 1-ի N 131Ա որոշման՝ Եղիպատրուշ գյուղի՝ համայնքային սեփականությունը հանդիսացող հողատարածքում 1208թ. և 1220թ.-ին համայնքի կողմից ինքնակամ կառուցված եկեղեցին ճանաչվել է որպես համայնքային սեփականություն, օրինական գույք:

Եկեղեցին սպասարկման տարածքով պետական գրանցում ստանալուց հետո հանձնվել է Հայաստանի առաքելական սուրբ եկեղեցուն:

Մինչդեռ՝ ըստ դատախազության՝ նշված եկեղեցին հանդիսացել է օտարման ոչ ենթակա և ընդգրկված է եղել պատմության և մշակույթի անշարժ հուշարձանների պետական ցուցակում:

Հիշեցնենք, որ վերջերս Ազգային ժողովի նախագահ Ալեն Սիմոնյանը սպառնացել էր հարկել Հայ Առաքելական եկեղեցուն՝ մասնավորապես վերանայել Եկեղեցուն վերաբերող՝ ավելացված արժեքի հարկից ազատված գործարքներն ու գործառնությունները: Իսկ «Քաղաքացիական պայմանագիր» խմբակցության պատգամավորները հայտարարել էին, որ ուսումնասիրում են եկեղեցուն պատկանող գույքը: ՔՊ խմբակցության քարտուղար Արթուր Հովհաննիսյանն օրինակ կարծիք էր հայտնել, որ Հայ Առաքելական եկեղեցու հաշվեկռշում կան հողեր, որոնք չեն օգտագործվում և կարող են օգտակար լինել պետությանը։

ԱՄՆ-ում կայացել է Դոնալդ Թրամփի և Ջո Բայդենի առաջին նախագահական բանավեճը։ Հեռուստադիտողների ու փորձագետների կարծիքով՝ գործող նախագահը ձախողեց, իսկ Հանրապետականը բացահայտ հաղթող էր։ Կողմնակիցները չեն բացառում, որ Բայդենը պետք է ընդհանրապես դուրս գա ընտրություններից, գրում է Meduza-ն, փոխանցում է Նյուզը։

Ամերիկացի լրագրողները գրում են, որ բանավեճից հետո դեմոկրատները սկսել են խուճապի մատնվել։ Politico-ն մեջբերում է Սպիտակ տան նախկին աշխատակցին, ով նախագահի ելույթն անվանել է «հրեշավոր»։ 

Սպիտակ տան նախկին մամուլի պատասխանատու Քեյթ Բեդինգֆելդը Բայդենի ելույթը «հիասթափեցնող» է անվանել. «Նրա հիմնական նպատակն էր ապացուցել մարդկանց, որ նա էներգիա և տոկունություն ունի, և նա չկարողացավ դա անել»: Դեմոկրատական ​​կուսակցության համար աշխատող ստրատեգը NYT-ին ասել է, որ  Բայդենը կբախվի ընտրություններից դուրս գալու կոչերի հեղեղին: «Այն մարդը, ով եղել է բեմում, չի կարող հաղթել։ Թրամփի հաղթանակի վախը լռեցրել է Բայդենի քննադատներին, և այժմ կխթանի դուրս գալու կոչերը»,- նշել է նա:

Հանրապետականները երկար ժամանակ առաջ են քաշել այն տեսությունը, որ դեմոկրատները Բայդենին կփոխարինեն մեկ այլ թեկնածուով օգոստոսյան համագումարի ժամանակ: Բայց մինչ բանավեճը սրա համար լուրջ պատճառներ չկային։ Այժմ դեմոկրատները շարունակում են հրապարակայնորեն ասել, որ թեկնածուին փոխարինելն անհնար է։

Բանն այն է, որ անցած գարնանը փրայմերիզում Բայդենը ստացել էր ձայների 99%-ը։ Կուսակցության կանոնների համաձայն, դա նշանակում է, որ 3900 պատվիրակները, ովքեր կհավաքվեն օգոստոսին համագումարի համար, որն ի վերջո կորոշի դեմոկրատ թեկնածուին, պետք է աջակցեն նրան, թեև նրանք իրավաբանորեն կապված չեն: Այսինքն՝ առանց Բայդենի համաձայնության անհնար կլինի նրան փոխարինել մեկ այլ թեկնածուով։

Եթե ​​նախագահը որոշի չառաջադրվել, ապա նույն համագումարում պատվիրակների ձայների մեծամասնությամբ կընտրվի նոր թեկնածու։ 

Իրանում արտահերթ նախագահական ընտրությունները, որոնք նշանակվել են մայիսին ավիավթարի հետևանքով երկրի նախագահ Էբրահիմ Ռաիսիի մահից հետո, մեկնարկել են ուրբաթ առավոտյան։
Իրանի գերագույն առաջնորդ այաթոլլա Ալի Խամենեին առաջիններից մեկն է, ով քվեարկել է ընտրություններում, հաղորդում են իրանական ԶԼՄ-ները։

Մայիսի 19-ին Իրանի հյուսիս-արևմուտքում ուղղաթիռի վթարի հետևանքով նախկին նախագահ Էբրահիմ Ռաիսիի մահից հետո, հանրապետության իշխանությունները, հետևելով սահմանադրությանը, հայտարարեցին նոր նախագահական ընտրությունների անցկացման մասին։ Սահմանադրության 131-րդ հոդվածի համաձայն՝ դրանք պետք է տեղի ունենան նախագահի մահվան կամ անգործունակության մասին հայտարարությունից և նրա պարտականությունները առաջին փոխնախագահին փոխանցելուց հետո 50 օրվա ընթացքում։ Այս պաշտոնը զբաղեցրել է փոխնախագահ Մոհամմադ Մոհբերը։

Նախագահի աթոռի համար պայքարին մասնակցում են ներքին գործերի նախկին նախարար Մոսթաֆա Փուրմոհամմադին, Ազգային անվտանգության բարձրագույն խորհրդում Իրանի գերագույն առաջնորդի ներկայացուցիչ Սաիդ Ջալիլին, խորհրդարանի ներկայիս նախագահ Մոհամմադ Բաղեր Ղալիբաֆը և առողջապահության և բժշկական կրթության նախկին նախարար, Իրանի խորհրդարանի անդամ Մասուդ Փեզեշկեան։

Քվեարկության առաջին արդյունքները կհրապարակվեն հունիսի 29-ին՝ մինչև կեսօր։

Givemesport.com-ը կազմել է ավարտված ակումբային մրցաշրջանի արդյունքում աշխարհի 20 լավագույն ֆուտբոլիստների դասակարգումը։

1. Վինիսիուս Ժունիոր («Ռեալ Մադրիդ», Բրազիլիա)

2. Ռոդրի («Մանչեսթեր Սիթի», Իսպանիա)

3. Կիլիան Մբապե (ՊՍԺ / «Ռեալ Մադրիդ», Ֆրանսիա)

4. Ջուդ Բելինգեմ («Ռեալ Մադրիդ», Անգլիա)

5. Ֆիլ Ֆոդեն («Մանչեսթեր Սիթի», Անգլիա)

6. Հարի Քեյն («Բավարիա», Անգլիա)

7. Էրլինգ Հոլանդ («Մանչեսթեր Սիթի», Նորվեգիա)

8. Կեւին Դե Բրույնե («Մանչեսթեր Սիթի», Բելգիա)

9. Տոնի Կրոս («Ռեալ Մադրիդ», Գերմանիա)

10. Լիոնել Մեսի («Ինտեր Մայամի», Արգենտինա)

11. Մարտին Էդեգոր («Արսենալ», Նորվեգիա)

12. Ֆլորիան Վիրց («Բայեր», Գերմանիա)

13. Դեքլան Ռայս («Արսենալ», Անգլիա)

14. Մատս Հումելս («Բորուսիա Դորտմունդ», Գերմանիա)

15. Կրիշտիանու Ռոնալդու («Ալ Նասր», Պորտուգալիա)

16. Ալիսոն Բեքեր («Լիվերպուլ», Բրազիլիա)

17. Մոհամեդ Սալահ («Լիվերպուլ», Եգիպտոս)

18. Լաուտարո Մարտինես («Ինտեր», Արգենտինա)

19. Անտուան Գրիզման («Աթլետիկո Մադրիդ», Ֆրանսիա)

20. Սոն Հին Մին («Տոտենհեմ», Հարավային Կորեա)

«Ամերիկայի ձայնը» գրում է․

Հինգշաբթի օրը կայանալիք առաջին նախագահական բանավեճում նրանք, հավանաբար, կփորձեն ուրվագծել այն դերը, որը նրանք կարծում են, որ Միացյալ Նահանգները պետք է խաղա համաշխարհային քաղաքականության մեջ:

Օսթինի Տեխասի համալսարանի պատմության պրոֆեսոր Ջերեմի Սուրիի խոսքով, թեկնածուների դիրքորոշումների տարբերությունները զարմանալի են։

«Բայդենի մոտեցումը լիբերալ ինտերնացիոնալիզմի և կոշտ ռեալիզմի համադրություն է, որը հիշեցնում է Սառը պատերազմը», - բացատրեց նա: «Թրամփի մոտեցումը մեկուսացման և միակողմանիության համադրություն է, որը հիշեցնում է Միացյալ Նահանգները Երկրորդ համաշխարհային պատերազմից առաջ»:

Այնուամենայնիվ, այն, ինչ, հավանաբար, ամենաշատ ուշադրությունը կգրավի, դա Ուկրաինայի պատերազմն է, որը շատերը վախենում են, որ կարող է վերաճել երրորդ համաշխարհային պատերազմի:

Բայդենի վարչակազմը ահազանգել է 2022 թվականի փետրվարին ռուսական ներխուժման մասին և խոստացել աջակցել Ուկրաինային «այնքան ժամանակ, որքան անհրաժեշտ է»։ Սակայն ԱՄՆ աջակցությունն այս տարի թուլացել է, քանի որ Կոնգրեսի հանրապետականները վեց ամսով հետաձգեցին 61 միլիարդ դոլար օգնության փաթեթի տրամադրումը:

Հուլիսին Վաշինգտոնում կայանալիք ՆԱՏՕ-ի գագաթնաժողովում Բայդենը կփորձի ամրապնդել Ուկրաինային աջակցելու դաշնակիցների հանձնառությունը՝ միաժամանակ Եվրոպայում դաշնակիցներին հանձնելով Կիևի աջակցության համակարգման պատասխանատվությունը: Ենթադրվում է, որ այս կերպ նա ցանկանում է պաշտպանել Ուկրաինայի աջակցությունը պոտենցիալ թշնամական Կոնգրեսից կամ ապագա նախագահից:

Հակամարտության նկատմամբ Թրամփի մոտեցումն ավելի բարդ է, հակասական և ընդգրկում է այս երկրի ղեկավարի հետ Թրամփի ունեցած սեփական փորձը։ Չէ՞ որ հենց Ուկրաինայի նախագահ Վոլոդիմիր Զելենսկու հետ ունեցած հեռախոսազրույցն է դարձել նրա առաջին իմպիչմենտի պատճառը։

Թրամփին մեղադրում էին օտարերկրյա տերությունից ոչ պատշաճ կերպով օգնություն խնդրելու մեջ՝ իր վերընտրվելու հնարավորությունները մեծացնելու համար, երբ նա Զելենսկիին խնդրեց օգնել իրեն քաղաքականապես վարկաբեկել Բայդենին։ Հանրապետականների մեծամասնությամբ Սենատն արդարացրել է նախագահին։

«Ես կլուծեմ [Ուկրաինայի պատերազմը] նախքան Սպիտակ տուն մտնելը՝ որպես նորընտիր նախագահ», - ասել է Թրամփը վերջերս տված հարցազրույցում։

Վերլուծաբանները նշել են, որ նա չի հստակեցրել, թե ինչպես է դա անելու։

«Նա միայն խոսեց ինչ-որ բանակցություններ սկսելու անհրաժեշտության մասին, ասաց, որ պատրաստ է մասնակցել Պուտինի և Զելենսկու այս բանակցություններին, բայց չհստակեցրեց, թե որն է լինելու խաղաղ համաձայնագրին հասնելու ապագա պլանը»,- ասել է Բեյլորի համալսարանի քաղաքագիտության պրոֆեսոր Սերգեյ Կուդելյան։

Բայդենը վերջերս վստահեցրել է Զելենսկիին, որ իրենց նոր՝ տասնամյա անվտանգության երկկողմ համաձայնագիրը «ևս մեկ հիշեցում է [Ռուսաստանի նախագահ Վլադիմիր] Պուտինին»։

«Մենք չենք նահանջում: Ավելին, մենք միասին դեմ ենք այդ անօրինական ագրեսիային»,- պարզաբանել է ԱՄՆ նախագահը։

Սակայն, ըստ վերլուծաբանների, Բայդենը միակը չէ, ով կարող է նման կոշտ դիրքորոշում ընդունել։

«Մենք գիտենք, որ Թրամփն իրեն ուժեղ առաջնորդ է համարում և չի ցանկանում կապ ունենալ արտաքին քաղաքականության ձախողման հետ», - «Ամերիկայի ձայնին» ասել է Ուկրաինայում ԱՄՆ նախկին դեսպան Ջոն Հերբստը՝ հավելելով. «Իսկ Ռուսաստանի հաղթանակն Ուկրաինայում նախագահ Թրամփի օրոք շատ նման կլինի արտաքին քաղաքականության ձախողման»:

168.am-ը գրում է․ Հունիսի 12-ին ԱԺ-Կառավարություն հարցուպատասխանի ժամանակ Նիկոլ Փաշինյանը դարձյալ հիշել է 2016 թվականի Արցախում մայիսին իր կուսակցության՝ ՔՊ ջոկատի կողմից խրամատ փորելը:

«Այստեղ ներկա են, մի րոպե սպասեք, Հակոբ Արշակյանն է եղել, Ռուբեն Ռուբինյանն է եղել, Հովիկ Աղազարյանն է եղել, Պարսիլյանն է եղել, Նարեկ Բաբայանն է եղել, Քրիստինեն է եղել, Հրաչն է եղել։ Մեզ տարել են դիրքեր … (Աղմկում են դահլիճում:) Այ, այսքան է եղել էնտեղ խրամատների խորությունը։ Անձրև է եկել այդ դիրքերի մեջ, պատմեք, մենք չենք կարողացել կանգնել այդ դիրքերում, ոտքերս տակերիցս փախչել են… (Խոսում են դահլիճում։) Ի՞նչ կապ ունի, բա, ինչո՞ւ եք տարել մեզ այնտեղ, եթե դիրքեր չեն եղել։ Դուք եք տարել, ո՞վ է տարել։ Ասում է` չգիտեմ` ով է տարել։ Դուք եք տարել։ Բա, մինչև հիմա ինչո՞ւ խրամատ փորված չէր, բա, այդ երկրորդ գիծը պիտի կահավորված չլինե՞ր։ Էսքա՞ն»,- ԱԺ ամբիոնից հայտարարել է Փաշինյանը:

Այս հայտարարությունից շատ չանցած՝ մեկ էլ Փաշինյանին Կոտայքի մարզում 2016 թվականին ՔՊ-ի ջոկատի խրամատ փորելու դրվագի տեսանյութն են նվիրում, ինչի մասին ֆեյսբուքյան իր էջում նա գրառում էր կատարել:

«Ազգային ժողովում վերջերս տեղի ունեցած հարցուպատասխանից հետո երեկ Կոտայքի մարզում ահա այսպիսի տեսանյութ նվեր ստացա՝ նկարահանված 2016 թվականին ՔՊ ջոկատի անդամ չհանդիսացած անձի կողմից. ՔՊ ջոկատի խրամատ փորելու դրվագ է: Տեսանյութում, իհարկե, երևում են ջոկատի ոչ բոլոր անդամները: Նրանցից շատերն այսօր բարձրաստիճան պաշտոնյա են՝ նախարար, գործադիր այլ մարմինների ղեկավարներ, պատգամավոր, համայնքների ղեկավարներ և այլն»,- գրել էր նա:

2018 թվականին էլ Նիկոլ Փաշինյանը հայտարարել էր, որ 2016 թվականին «մարտական ծառայություն է իրականացրել Արցախի Ճանկաթաղ գյուղի հատվածում»:

«Եվ 2016 թվականին, երբ անհրաժեշտություն էր առաջացել, մենք մեր կուսակցությունում կամավորական ջոկատ ենք կազմել, որը, մինչև կամավորական ջոկատներին հետ կանչելու վերջին օրը, մարտական ծառայություն է իրականացրել Լեռնային Ղարաբաղի Հանրապետության Ճանկաթաղ գյուղի հատվածում: Այդ ժամանակ եղել եմ Ազգային ժողովի պատգամավոր, և այդ կարգավիճակն ինձ չի խանգարել ավտոմատ կրել, խրամատ փորել և կանգնել պաշտպանության դիրքերում»,– 2018-ի մայիսին ԱԺ-ում ասել էր Փաշինյանը:

Նշենք, որ ՔՊ ջոկատը 2016 թվականին Արցախ՝ Մարտակերտ էր մեկնել մայիսի 14-ին, իսկ Ճանկաթաղն այդ ժամանակ սահմանից տասնյակ կիլոմետրեր հեռու էր, բնակավայրը սահմանամերձ չէր համարվում: Այլ հարց է, որ 2020 թվականի 44-օրյա պատերազմից հետո օկուպացված Արցախի Հանրապետության Մարտակերտի շրջանի Ճանկաթաղ գյուղը հայտնվեց թշնամու նշանառության տակ, իսկ 2023 թվականին անցավ Ադրբեջանի վերահսկողությանը, երբ ամբողջ Արցախը կորցրեցինք:

Այսինքն, ՔՊ ջոկատը միայն խրամատ է փորել սահմանից հեռու գտնված Ճանկաթաղում: Սա պատերազմին մասնակցություն չէ, ոչ էլ մարտական լուրջ հերթապահություն:

Ի դեպ, մի ժամանակ այս ամենը, որը 18 տարեկան ժամկետային զինվորը 2 տարվա ընթացքում անում է և ոչ մեկ անգամ, Փաշինյանի կողմից ժողովրդի վրա «վաճառվում էր»՝ որպես Ապրիլյան պատերազմին մասնակցություն: Գուցե ՔՊ ջոկատին՝ նրա հրամանատարը եղած Նիկոլ Փաշինյանին նման տպավորություն ունենալու և ստեղծելու համար հիմք էր հանդիսացել այդ ժամանակ ՀՀ պաշտպանության նախարար Սեյրան Օհանյանի՝ ՔՊ ջոկատի անդամներին պատվոգրեր ու մեդալներ տալու որոշո՞ւմը, ինչը, ի դեպ, Սեյրան Օհանյանը չի հերքել:

Մասնավորապես, 2021 թվականին ԱԺ-ում «Հայաստան» խմբակցության ղեկավար, ՀՀ պաշտպանության նախկին նախարար Սեյրան Օհանյանը` պատասխանելով «Հայաստան» դաշինքի պատգամավոր Արեգնազ Մանուկյանի հարցին՝ ի վերջո, Փաշինյանը մասնակցե՞լ է 2016թ. Ապրիլյան պատերազմին, նշել էր.

«Փաշինյանի գլխավորած ստորաբաժանումը մասնակցել է ինժեներական աշխատանքների։ Դա չի համարվում մարտական գործողությունների մասնակից։ Այսինքն` ինչպես շատ-շատ մեր հայրենակիցներ` համակողմանի ապահովման խնդիրներով իրենց պատրաստակամությունն են հայտնել»:

Այնուհետև ՀՀ պաշտպանության նախկին նախարարը նշել էր, որ ՔՊ ջոկատն «իր կատարած աշխատանքների համար բանակի հրամանատարության կողմից գնահատվել է` պատվոգիր են ստացել»:

«Ես այդ պատվոգիրը ստորագրել եմ, հիմա հո հետ չե՞մ վերցնելու»,- շեշտել էր Օհանյանը՝ հավելելով, որ քաղաքական թիմի մեծամասնության մոտ PR-ի աստիճանը բարձր է։

Նշենք, որ ՀՀ պաշտպանության նախարար Սուրեն Պապիկյանի կենսագրականում նշվում է, որ 2016թ. պարգևատրվել է ՀՀ պաշտպանության նախարարության «Գարեգին Նժդեհ» մեդալով: Կարո՞ղ ենք ենթադրել՝ Ճանկաթաղում խրամատ փորելու համար:

Այս մեդալով պարգևատրվում են բանակաշինության, ՀՀ ԶՈՒ մարտական պատրաստության և ռազմահայրենասիրական դաստիարակության բնագավառում զգալի ներդրում ունեցող սպաները և ենթասպաները, ժամկետային ծառայության ընթացքում հայրենիքի սահմանների պաշտպանության, զինծառայողների կյանքին սպառնացող վտանգը վերացնելու գործում անձնական խիզախություն ցուցաբերած զինծառայողները, հայկական բանակի կայացման և ամրապնդման գործում զգալի ավանդ ունեցող անհատները։

Գուցե ՀՀ պաշտպանության նախկին նախարար Սեյրան Օհանյանը փորձել է վարձահատույց լինել ՔՊ-ական ջոկատին՝ հաշվի առնելով նրանց ընդդիմադիր լինելը: Այլ հարց է, որ հիմա ՔՊ ջոկատականներն ու նրանց «հրամանատարը»՝ լինելով իշխանություն, իրենց պատվոգրերի, մեդալների, գնահատված լինելու, բանակում չծառայելու կամ ծառայությունից առողջ վերադարձի համար այլ կերպ են «վարձահատույց» լինում. չեն հարգում իրենց պատվոգիր տված Պաշտպանության նախկին նախարարի անցած ճանապարհը, զինվորական կոչումը, տարիքը և այլն… Այսինքն, մի կողմում գործ ունենք բարոյական սահմանների հատման հետ, մյուս կողմում, այսպես ասած, բարոյական և համեստ լինելու, ինչը նման դեպքերում արդարացված չէ…

Իսկ հիմա էլ արդեն իշխանություն դարձած ՔՊ-ականներն են որոշել՝ իրենք պետք է ուրիշին խրամատ փորել տան՝ խոստանալով պետության կողմից խրախուսանք: Եվ եթե նախկին իշխանությունների օրոք ոչ մարտական պայմաններում նման երևույթի չէիր կարող հանդիպել, քանի որ անկախ ռեսուրսային խնդրից, խրամատ փորում էր զինվորը, դիրք չէր վստահվում վարժանքի մասնակցին, ով մի քանի օրով թարմացրել էր զինվորական ծառայության ընթացքում ստացած գիտելիքները: Ինչպես ասում են՝ իրավիճակ է փոխվել:

Եվ հունիսի 26-ին ԱԺ պաշտոնական կայքից տեղեկանում ենք, որ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն առաջարկել է ձևավորել ուսանողական կամավոր ջոկատներ, որոնք դիրքերում կմասնակցեն որոշակի ինժեներական աշխատանքների, նախաձեռնության գաղափարն առաջացել է հանձնաժողովի և պաշտպանական գերատեսչության ղեկավարության հետ առաջնագծի ինժեներական կառույցներ այցերի ընթացքում:

Նշվում է, որ Անդրանիկ Քոչարյանն առաջարկը քննարկել է թե՛ իր ղեկավարած հանձնաժողովի անդամների, և թե՛ Պաշտպանության ու ԿԳՄՍ նախարարների հետ՝ ստանալով վերջիններիս հավանությունը: Այսինքն, ՀՀ պաշտպանության նախարար Սուրեն Պապիկյանը համաձայն է, որ Վազգեն Սարգսյանի անվան ռազմական ակադեմիայի կուրսանտները հուլիս-օգոստոս ամիսներին խրամատ փորեն, և ոչ թե ռազմական անհրաժեշտ գիտելիքներ փորձեն ստանալ կամ կատարելագործել ստացածը, հատկապես, երբ, ինչպես պնդում է ՀՀ ԶՈւ ղեկավարությունը, բռնել են ՆԱՏՕ-ական չափանիշներով բանակ ունենալու ուղին՝ հրաժարվելով ռուսական «շկոլայից»։

Ամրացված շրջանները չինական պատի հետ համեմատող Անդրանիկ Քոչարյանն ասում է՝ ուսումնասիրել են միջազգային փորձը, և պարզվել է, որ նմանատիպ ծրագրեր իրականացվում են եվրոպական մի շարք երկրներում: Գուցե սա նաև ՆԱՏՕ-ական չափանիշների՞ց է: Իսկ թե եվրոպական ո՞ր երկիրն է ապրում խրամատային կյանքով, որը ստիպված է ռազմական և ոչ ռազմական բարձրագույն հաստատությունների սովորողներին խրամատ փորել տալ, ՀՀ պաշտպանության նախարարություն հարցում ենք ուղարկել, պատասխանը ստանալուն պես կհրապարակենք, գուցե մենք բավարար տեղեկություն չունենք:

Միգուցե լինեն մարդիկ, որ կասեն՝ ի՞նչ վատ բան կա, եթե երիտասարդները ներգրավված լինեն երկրի պաշտպանության գործին և հուլիս-օգոստոս ամիսներին խրամատ փորեն, հետո էլ խրախուսվեն պետության կողմից: Ոչ մի վատ բան, բայց նայած, թե ինչ տեսանկյունից ենք հարցին մոտենում:

Եվ հետո, երբ հիմք ենք ընդունում երկրի, պաշտպանության նախարարության, զինված ուժերի հայտարարությունները ՆԱՏՕ-ական չափանիշներով բանակ ստեղծելու, բանակը կերպափոխելու, ռուսական կամ սովետական ռազմական չափանիշներից, խրամատներում բանակը պահելու 30-ամյա սկզբունքից հրաժարվելու, առնվազն ծիծաղելի է: Այսինքն, իրենք իրենց հակասում են, նաև ցույց տալիս, որ ձախողել են պրոֆեսիոնալ բանակ ստեղծելու իրենց խոստումների կատարման հարցում, ավելին, անգամ եղածը չեն պահել:

Ի դեպ, ապրիլին ՔՊ-ական պատգամավոր, ԱԺ պաշտպանության և անվտանգության հարցերի հանձնաժողովի անդամ Վիլեն Գաբրիելյանը հայտարարել էր.

«Ես ընդհանրապես համարում եմ, որ 21-րդ դարում մարտական հենակետ պահելը դա հետամնացության նշաններից մեկն է՝ ռազմական տեսանկյունից: Ինձ որ հարցնեք, ավելի լավ է մարտական հենակետեր չունենալ, կենդանի ուժ չպահել, բայց ցանկացած մարդուն, որն ապօրինաբար կխախտի սահմանը, հենց մի միլիմետր խախտի քո սահմանը, դու տեղում խնդիրը լուծես: Պաշտպանության նախարարը շուտով գալու է նոր նախագծերով, և մենք, ի վերջո, կարողանալու ենք ձևավորել տարածքային պաշտպանության համակարգը, ստեղծել տարածքային պաշտպանության ուժեր, որոնք պետք է հիմնված լինեն տեղի բնակիչների ներուժի վրա նաև: Դա նշանակում է՝ այն մարդը, որտեղ բնակվում է, պարտավոր է ներգրավված լինել որոշակի ստորաբաժանման մեջ, որն ապահովելու է տվյալ տարածքի պաշտպանությունը: Մեր անվտանգային համակարգը և պաշտպանունակությունը պետք է բարձրացվեն»:

Իսկ կեսկատակ-կեսլուրջ փաշինյանական կամ անդրանիկքոչարյանական վերջին գաղափարը մի տեսակ դեժավյու է առաջացնում, երբ 44-օրյայի ժամանակ գերագույն հրամանատար Նիկոլ Փաշինյանը հրահանգ էր արձակել.

Քայլ 1. Ձևավորել կամավորական ջոկատ (նվազագույնը 30 հոգի):

Քայլ 2. Ընտրել հրամանատար:

Քայլ 3. Դիմել հրամանատարի բնակության վայրի զինկոմիսարիատ:

Քայլ 4. Զորամասերից մեկում անցնել ներդաշնակում, պատրաստում:

Քայլ 5. Մեկնել հայրենիքի պաշտպանության առաջնագիծ:

Քայլ 6. Հաղթել:

Թե ինչպես ընթացավ և ավարտվեց 2020 թվականի 44-օրյա պատերազմը, լավ ենք հիշում: Բոլորս ենք հիշում:

Թե որքանով է Նիկոլ Փաշինյանի իշխանությանը հաջողվել սպայի մասնագիտությունը գրավիչ դարձնել՝ բնակարան և բարձր աշխատավարձ տալով, օրեր առաջ, թերևս, լավագույնը հենց ՔՊ-ական պատգամավոր Արմեն Խաչատրյանն ապացուցեց՝ ասելով. «Սպան գալիս, ասում է` չեմ ծառայում, վերցրեք ձեր 10 մլն-ը, ես գնացի…»:

Հ.Գ. Նշենք, որ Անդրանիկ Քոչարյանի առաջարկի իրականացման դեպքում պետք է համապատասխան անվտանգային միջավայր ստեղծվի, մշակվի միջոցառումների պլան, հատկապես, երբ այսօր, ավելի քան երբևէ, հայկական կողմի տեղաշարժերը թշնամու թիրախում են կամ տեսադաշտում: Բացի այս, այստեղ նաև գաղտնիության հետ կապված հարցեր կան, քանի որ ցանկացած մեկին հասանելի է դառնում ԶՈՒ հնարավոր խրամատի տեղը, հնարավորությունները և իրականացվելիք խնդիրները: Արդյո՞ք այս ամենը հաշվի է առնվել:

Արմեն Հովասափյանը ֆեյսբուքյան իր էջում գրում է. «Տևական ժամանակ է՝ չեմ խոսում քաղաքական գործընթացներից, գնահատականներ չեմ տալիս կատարվող իրադարձություններին, առավել ևս նիկոլական ցնդաբանություններին։

Ինչ-խոսք ժամանակները բարի չեն, իսկ տեղի ուենցողը՝ քաղաքականության հետ ոչ մի աղերս չունի, ուղղակի քաոտիկ տեղապտույտ է, որում ամեն ինչ տակնուվրա է եղել, իսկ պղտոր ջրում ձուկ որսացողների պակաս, ընդհանրապես, չկա։

Ներքաղաքական քաոսին շատ համընթաց զուգադրվում է նաև աշխարհքաղաքական վակխանալիան, որն աստիճանաբար սեղմում է պնդողակը՝ բոլորիս առաջ անլուծելի ռեբուսներ առաջադրելով։

Մենք ապրում ենք «ավազե Հայաստանում», ոչ թե «պատմական» կամ «իրական». «ավազե Հայաստան», որը կարող է փլվել ու կորչել առաջին իսկ քամուց, իսկ «աշխարհքաղաքական պտտահողմերի» պակաս, ցավոք սրտի, չունենք։

Վեց տարուց ավել երկիրը քարուքանդ անող արհավիրքը, ով իր կառավարման տարիների ընթացքում պրոհայկական ոչ մի քայլ չի արել, անամոթաբար, պատեհ-անպատեհ խոսում է «պատմական առաքելությունից» ու «պատմական Հայստանից»։ Մարդը, ով պատմության ու հայկականության հետ ընդհանուր ոչինչ չունի և սպասարկում է զուտ թուրքական օրակարգ, տեսախցիկներին նայելով, «հայի պատմական առաքելությունից» է խոսում, ամպագորգոռ հոխորտում «ապագայի Հայաստանի» մասին։

Նիկոլի համար գլխավոր ու միակ հաղթաթուղթը, որով նա կարողացել է և դեռևս կարողանում է տարբեր շահարկումներ անել, չի փոխվել․ ինչպես 6 տարի առաջ՝ իշխանազավթման և պետական կարգի տապալման ժամանակ էր խաղարկում, այժմ էլ, երբ երկրի ղեկավար է ու միանձնյա կառավարիչ, դարձյալ նույն մարտավարությունն է՝ «ՆԱԽԿԻՆՆԵՐԸ»։

Եթե կարճ, Նիկոլն ունի համառոտ բանաձև, «ժողովուրդ եթե ես գնացի, գալիս են նախկինները ու նորից ամեն ինչ սկսվում է հին ձևով, բո դուք ուզո՞ւմ եք նման բան»։ Այս թեզը, արդեն նոր փաթեթավորմամբ, շահարկում են նաև որոշ «ընդդիմադիր» ինքնահռչակ շրջանակներ, ովքեր փոխանակ պայքարեն նիկոլիզմի դեմ, «նախկինացավով» են տառապում։ Սա Նիկոլի կողմից խաղարկվող պարտիայի մի բաղադրիչ է՝ «նախկիններին» թիրախավորել նաև ոչ իր դեմքով։ Ովքե՞ր են նախկինները, նրանք, որոնք մի ձեռքի շարժումով ճամբարափոխ եղան ու թռան Նիկոլի գիրկը՝ ստանալով փոխվարչապետ, Պն նախարարի, ֆինանսների նախարարի պաշտոնը, թե՞ նրանք, ովքեր Նիկոլի ճակատին ասում են, որ թուրքական դուդուկի տակ է պարում։

Դեմոնիզացիայի գուրուն շատ լավ գիտի, թե որ դեպքում, ինչ սոուսով թեման պետք է «եփել», նա դրա գրոսմայստերն է․ թեման փաթեթավորել այնպես, որ վեկտորն ուղղվի դեպի նախկինները, իսկ ավելի շատ դեպի Սերժ Սարգսյանը, մարդ, ով քանիցս բաց տեքստով հայտարերլ է, որ ոչ մի պարագայում իշխանության գալու նպատակ ու ցանկություն չունի։

Սարգսյանի նկատմամբ նիկոլական վախերն առերևույթ են․ ՀՀԿ-ին մի քանի անգամ «թաղած», այն որպես «քաղաքական դիակ» մի քանի անգամ հռչակածը, օր ու գիշեր շարունակում է պայքարել նույն «քաղաքական դիակի» դեմ, որն այս ընթացքում բավական զտվել է ու «պարզաջրվել»։

Ավելին, Սերժ Սարգսյանի դեմ ինքնամոռաց պայքարողն այդպես էլ չկարողացավ հասկանալ, որ ինքը, ի տարբերություն Սարգսյանի, պետական մտածողության ու պետություն ասվածի հետ ոչ մի աղերս չունի, որ քաղաքական կյանքը կրկեսի վերածածը, ընդամենը արյունոտ ժանգլյոր է, ով բացի արյունոտ տեսարաններ բեմադրելուց, ոչ մի այլ բան անել չի կարողանում, իսկ հասարակությունը սպունգ չի, որ անընդհատ կլանի այդ ամենը, վերջիվերջո, մի օր այն պայթելու է»։

Վաղը՝ հունիսի 28-ին, հիմնական փուլի վերջին քննական օրն է 2416 դիմորդի համար: Նրանցից 1320-ը հայոց պատմություն է հայտագրել, 1096-ը՝ ֆիզիկա: Քննական կենտրոնները 24-ն են, 17-ը՝ մարզերում, 7-ը՝ Երևանում:

ԳԹԿ փոխանցմամբ, ներկայացնում եմ մայրաքաղաքի քննական կենտրոնները՝ հասցեներով, դիմորդների թվով՝ ըստ հանձնվող առարկաների:

թիվ 11 հիմնական դպրոց, ՀԱԹ, Բ2, հայոց պատմություն, 140 դիմորդ;

1. թիվ62 ավագ դպրոց, Նոր Նորք, Նանսենի 6, դիզիկա, 120 դիմորդ;
2. թիվ 189 ավագ դպրոց, Դավիթաշեն, 1-ին թաղամաս, հայոց պատմություն, 140 դիմորդ;
3. թիվ 190 ավագ դպրոց, ՀԱԹ, Բ2, հայոց պատմություն, 140 հոգի;
4. թիվ 170 ավագ դպրոց, Ավան, Թումանյան 3, ֆիզիկա, 120 դիմորդ;
5. թիվ 155 հիմնական դպրոց, Աջափնյակ, Բաշինջաղյան 2-րդ նրբանցք, ֆիզիկա 131դիմորդ և
6. թիվ 57 հիմնական դպրոց, Կենտրոն, Վրացյան 75, ֆիզիկա, 80 դիմորդ: