Գյումրեցին համարձակ քայլ արեց, վտանգեց սեփական բարեկեցությունը՝ հանուն Հայաստանի, հետեւաբար, պետք է սկսել գործընթաց նաեւ Երեւանում: NEWS.am-ի հետ զրույցում նման կարծիք հայտնեց Շիրակի թեմի առաջնորդ Գերաշնորհ Տեր Միքայել արքեպիսկոպոս Աջապահյանը
«Եթե գործընթաց չսկսվեց առաջիկա մեկ-երկու ամսում, ՔՊ-ն կհղփանա եւ ամենայն հավանականությամբ, կսկսի պատժիչ գործողություններ: Այսօր ընդդիմությունը կամ պետք է թողնի հեռանա, կամ գործ անի: Եթե իշխանությունները պրոցես չտեսան, կսկսեն վրեժ լուծել եւ հնարավոր է՝ շարքային գյումրեցին գլխին տա, թե ինչ սխալ արեցի»,- ասաց Միքայել Սրբազանը:
Նա անդրադարձավ նաեւ ՔՊ-ականների այն դիրքորոշմանը, թե Գյումրիի նորընտիր քաղաքապետը շատ քիչ կպաշտոնավարի: Ըստ Սրբազանի՝ դա իշխանական շանտաժ է. «Սա հանցագործություն է, պետական մակարդակի հանցագործություն է: Ո՞նց կարելի է պետական շանտաժով սպառնալ, սա խոսում է այս իշխանությունների կատարյալ անբարոյականության մասին»:
Միքայել Սրբազանը նաեւ անդրադարձավ վարչապետի խոսնակ Նազելի Բաղդասարյանի այսօրվա գրառմանը: Սրբազանը տարակուսած է՝ ինչ լծակների է տիրապետում Բաղդասարյանը, որ նման հայտարարություններ է անում: Նշենք, որ Փաշինյանի խոսնակն այսօր մասնավորապես գրել է. « Ու Աստված չանի՝ մեկի գլխից մազ ընկնի»:
«ՆԳՆ-ն է իրեն ենթակա՞, թե՞ ԱԱԾ-ն, ինքը մեր բոլոր գյումրեցիների մազերը հաշվե՞լ է, որ գիտի՝ կպակասի, թե ոչ: Այդ աղջիկը պիտի հասկանա՝ ինչ է խոսում, նման բան նույնիսկ ՆԳ նախարարն է սխալ, որ ասի»,- ասաց նա:
0Comments