Իսրայելի Կենտրոնական ընտրական հանձնաժողովը հայտնել է, որ խորհրդարանական ընտրություններում մինչև կեսօր քվեարկել է մոտ 2,3 միլիոն իսրայելցի կամ ընտրողների 31,5%-ը, ինչը 1977 թվականից ի վեր մասնակցության ռեկորդային ցուցանիշ է։
«Ժամը 12:00-ի դրությամբ քվեարկել է մոտ 2,3 միլիոն մարդ։ Մասնակցությունը կազմում է 31,5%։ Սա 1977 թվականից ի վեր ամենաբարձր ցուցանիշն է (այս ժամանակահատվածի համար)», — ասվում է հաղորդագրության մեջ։
Կենտրոնական ընտրական հանձնաժողովի տվյալներով՝ երկրի ավելի քան 10 միլիոն քաղաքացիներից քվեարկելու իրավունք ունի մոտ 7,3 միլիոնը։ Ամբողջ երկրում տեղակայվել է ավելի քան 12 հազար ընտրատեղամաս։ Սրանք առաջին ընտրություններն են Իսրայելում՝ 2023 թվականի հոկտեմբերի 7-ին ՀԱՄԱՍ շարժման հարձակումից և Իրանի հետ պատերազմի մեկնարկից հետո։ Ընտրատեղամասերը բաց են տեղական ժամանակով 07:00-ից մինչև 22:00-ն։
120 տեղանոց խորհրդարանում առաջադրվել են 36 կուսակցության թեկնածուներ: Քնեսեթում ներկայացված լինելու համար կուսակցությունը պետք է հավաքի ձայների առնվազն 3,25%-ը:
Իշխող կոալիցիայում հիմնական դերակատարներն են վարչապետ Բենիամին Նեթանյահուի գլխավորած «Լիկուդ» կուսակցությունը, «Կրոնական սիոնիզմ» և «Հրեական ուժ» ազգայնական-կրոնական կուսակցությունները, «Թորայի հրեականություն» ուլտրաօրթոդոքս քաղաքական դաշինքը, ինչպես նաև ՇԱՍ ուլտրաօրթոդոքս կուսակցությունը։
Գլխավոր ընդդիմադիր ուժերն են գեներալ-լեյտենանտ Գադի Այզենկոտի գլխավորած ցենտրիստական «Յաշար» կուսակցությունը, նախկին վարչապետ Նաֆթալի Բենեթի ցենտրիստական «Բե-Յահադ» դաշինքը և Ավիգդոր Լիբերմանի աջակողմյան «Մեր տունն Իսրայելն է» կուսակցությունը։ Հարցումների համաձայն՝ անցողիկ շեմը հաղթահարում են նաև արաբական կուսակցությունների միացյալ ցուցակն ու ձախակողմյան «Դեմոկրատներ» կուսակցությունը։