Իրանի հետախուզության նախարարությունը հայտարարել է երկրի հարավ-արևելքում գտնվող Սիստան և Բելուջիստան նահանգում չորս ահաբեկչական բջջի վնասազերծման մասին, հայտնում է Tasnim-ը։
Գերատեսչության տվյալներով՝ ձերբակալվել է 19 մարդ, այդ թվում՝ խմբավորումների 16 ենթադրյալ անդամ և ռազմական ու պաշտպանական օբյեկտների մասին տեղեկություններ հավաքելու մեջ կասկածվող երեք անձ։
Ինչպես նշվում է հետախուզության նահանգային վարչության հայտարարության մեջ, չորս բջիջները հայտնաբերվել են նահանգի կենտրոնական և հարավային շրջաններում՝ քաղաքացիների հաղորդումների, օպերատիվ դիտարկման և ուժային այլ կառույցների հետ համագործակցության շնորհիվ։ Ձերբակալվածներից ոմանք, ըստ գերատեսչության, Իրան են ժամանել արտերկրից։
Նախարարությունում հայտարարել են նաև, որ կասկածյալների մի մասը առնչություն ունի Իրանշահր շրջանում ոստիկանության մի քանի աշխատակցի մահվան հետ։ Ձերբակալվածները հանձնվել են դատական մարմիններին։
Գործողության ընթացքում ուժայիններն առգրավել են 18 միավոր հրազեն, դրանց թվում՝ Կալաշնիկովի ինը ինքնաձիգ, ամերիկյան երկու M4 հրացան և յոթ ատրճանակ, ինչպես նաև դրանց համար նախատեսված զինամթերք։
Նախարարությունը հայտնել է նաև երեք անձի ձերբակալման մասին, որոնք կասկածվում են նահանգի հարավում ռազմական շտաբների և պաշտպանական օբյեկտների տեղակայման մասին տեղեկություններ հավաքելու և փոխանցելու մեջ։ Գերատեսչությունը նրանց գործունեությունը կապել է հակառակորդի հետախուզական-մեդիա ցանցի հետ, սակայն չի հստակեցրել, թե, ըստ քննության վարկածի, կոնկրետ որ կազմակերպության օգտին են գործել ձերբակալվածները։
Հետախուզության նախարարությունը քաղաքացիներին շնորհակալություն է հայտնել աջակցության համար և կոչ արել կասկածելի գործունեության մասին հայտնել 113 թեժ գծի հեռախոսահամարով կամ սոցիալական ցանցերում գերատեսչության պաշտոնական ալիքներով։
Սիստան և Բելուջիստանը Իրանի հարավ-արևելքում գտնվող սահմանամերձ նահանգ է, որը սահմանակից է Պակիստանին և Աֆղանստանին։ Տարածաշրջանում գործում են զինված խմբավորումներ, դրանց թվում՝ բելուջական անջատողական կազմակերպություններ, իսկ Իրանի անվտանգության ուժերը պարբերաբար գործողություններ են իրականացնում զինյալների դեմ։