Ուկրաինայի նախագահի հաղորդակցությունների հարցերով խորհրդական Դմիտրի Լիտվինը ТСН.ua-ին հաստատել է, որ Կիևի ուղղությամբ բալիստիկ հրթիռների արձակման մասին արևմտյան գործընկերներից կրկին նախազգուշացումներ չեն եղել։ Նրա խոսքով՝ զինվորականներն ու համապատասխան ծառայությունները պարզում են բոլոր հանգամանքները։
Այսպիսով, Ուկրաինայի պաշտպանության ուժերը չգիտեին, որ արձակումներ են նախապատրաստվում։ Տագնապը միացվել է, երբ նկատել են թիրախները։
Ավելի ուշ Օդային ուժերը հրապարակել են պաշտոնական հաղորդագրություն, որում նշել են, որ հոկտեմբերի 13-ին՝ մոտ 22:40-ին, Ռուսաստանը բալիստիկ հրթիռներով հարված է հասցրել Կիևին։
«Իրավիճակը նման է երեկվանին․ գործընկերներից հակառակորդի տարածքից արձակումների մասին տեղեկատվություն չի ստացվել։ Պատճառները ճշտվում են։ Հակառակորդը նենգաբար բալիստիկ հրթիռներով հարվածում է խաղաղ բնակչությանը, չեն բացառվում կրկնակի հարձակումներ», — զգուշացրել են Ուկրաինայի բանակում։