Թուրքիայում Մարմարա ծովը մոտ ապագայում կարող է կործանվել կեղտաջրերի անբավարար մաքրման պատճառով, հայտարարել է Թուրքիայի ծովային հետազոտությունների հիմնադրամի նախագահ, Ստամբուլի համալսարանի պրոֆեսոր Բայրամ Օզթյուրքը։
Նրա խոսքով, ինչպես փոխանցում է T24 թերթը, Մարմարայի տարածաշրջանում մաքրման կայանների մոտ 50%-ն է գործում, մինչդեռ մնացած կեղտաջրերը առանց լիարժեք մաքրման լցվում են ծով։ Սա, նշել է գիտնականը, խորացնում է թթվածնի պակասը և վտանգ է ստեղծում էկոհամակարգի համար։
«Սա նշանակում է, որ մոտ ապագայում ծովը կկործանվի», — զգուշացրել է Օզթյուրքը՝ խոսելով Մարմարա ծով անբավարար մաքրված թափոնների արտահոսքի հետևանքների մասին։
Գիտնականը կոչ է արել թույլ չտալ, որ Մարմարա ծով նույնիսկ մեկ լիտր չմաքրված կենցաղային կամ արդյունաբերական կեղտաջուր լցվի։ Նա կարծում է, որ ծովը փրկելու համար անհրաժեշտ է համազգային մոբիլիզացիա։
Խոսելով Սև ծովի մասին՝ գիտնականը այն անվանել է թուրքական ձկնորսության «դրոշակակիր», սակայն նախազգուշացրել է ձկան պաշարների սպառման մասին՝ չափազանց մեծ որսի և աղտոտման պատճառով։ Նրա խոսքով՝ ծովը արագ տաքանում է և դառնում է Միջերկրականին նման։
Էգեյան ծովում Օզթյուրքը առաջարկել է Թուրքիային և Հունաստանին ստեղծել համատեղ պահպանվող տարածքներ։ Նա նշել է, որ Գյոքչեադա և Սամոթրակի կղզիների միջև վերջերս հայտնաբերվել է Էգեյան ծովի ամենամեծ մարջանային անտառներից մեկը, որը, նրա կարծիքով, պետք է համատեղ պաշտպանել։
Առանձին սպառնալիք գիտնականը տեսնում է Միջերկրական ծովի համար։ Նրա խոսքով՝ վերջին 50 տարիների ընթացքում ծովի ջրի ջերմաստիճանը բարձրացել է 1,5 աստիճանով, իսկ մարջանների որոշ տեսակների մոտ արդեն նկատվում է գունազրկում։
Օզթյուրքը նաև զգուշացրել է ինվազիվ ձկնատեսակների տարածման մասին, ինչը նա կապում է կլիմայի փոփոխության հետ։ Բացի այդ, ափ հասնող պլաստիկը, այդ թվում՝ Անթալիայի շրջանում, ռիսկեր է ստեղծում զբոսաշրջության ոլորտի համար։