Իրանն ու Օմանը քննարկել են Հորմուզի նեղուցով նավագնացության ապահովման փուլային ծրագիրը, որն ուղղված է վերջերս տեղի ունեցած պատերազմի հետևանքների և դրանով պայմանավորված իրավիճակի վատթարացման հաղթահարմանը։ Այս մասին հայտնում է IRIB-ը։
Երկու երկրների համատեղ հայտարարության համաձայն՝ առաջարկվող նախագիծը նախատեսում է Հորմուզի նեղուցով ժամանակավոր ծովային միջանցքի ստեղծում, ինչպես նաև ջրային տարածքի ականազերծման համատեղ ծրագրի իրականացում։
Իրանի և Օմանի միջև տեխնիկական բանակցությունները կշարունակվեն։ Դրանց նպատակը մշտական ծովային միջանցքի ձևավորման, նեղուցի հետագա կառավարման, ինչպես նաև տեղեկատվության փոխանակման, նավերի երթևեկության կարգավորման և նավագնացության ու անվտանգության ծառայությունների տրամադրման մեխանիզմների շուրջ համաձայնության հասնելն է։
Կողմերը նաև ընդգծել են Պարսից ծոցի ավազանի տարածաշրջանային այլ երկրների հետ համատեղ խորհրդակցություններ անցկացնելու կարևորությունը։
Բացի այդ, Իրանն ու Օմանը հայտարարել են միջազգային իրավունքի նորմերը պահպանելու և ափամերձ պետությունների ինքնիշխան իրավունքները հարգելու անհրաժեշտության մասին։