Վենեսուելայի մայրաքաղաքի բնակիչները երկրաշարժի սկսվելուն պես լքել են իրենց տները՝ փրկություն փնտրելով փողոցում։ Այս մասին դեպքի վայրից հայտնել է կոլումբիական «Rádio Caracol» ռադիոկայանի թղթակից Գաբրիելա Գոնսալեսը։
«Բնակարանիս դուռը չէր բացվում. ստիպված էի ոտքով հարվածել ու կոտրել, որպեսզի դուրս գամ, քանի որ ցնցումներից ծռվել էր։ Մարդիկ սկզբում նույնիսկ չէին հասկանում՝ ինչ է կատարվում, բայց երբ մեծամասնությունը գլխի ընկավ, որ երկրաշարժ է սկսվել, իսկույն վազեցին փողոց»,- պատմել է նա ուղիղ եթերում։
«Վենեսուելայի իշխանությունները դեռևս հստակ տվյալներ չեն տրամադրել զոհերի թվի կամ նյութական վնասների չափի մասին, սակայն մեր մայրաքաղաքային տարածաշրջանում ավերածությունները հսկայական են»,- հավելել է թղթակիցը։
Վենեսուելայում երկրաշարժը տեղի է ունեցել հունիսի 24-ի երեկոյան. մոտ 40 վայրկյան ընդմիջումով գրանցվել է ստորգետնյա ցնցումների երկու ալիք՝ 7,2 և 7,5 մագնիտուդ ուժգնությամբ։ Դրանց էպիկենտրոնները գտնվել են Վենեսուելայի Յարակույ նահանգում՝ միմյանցից ընդամենը 10 կիլոմետր հեռավորության վրա։