Ռուսական բարձրաստիճան ավելի ու ավելի շատ պաշտոնյաներ են հանգում այն մտքին, որ Ուկրաինայում պատերազմի շարունակությունը Ռուսաստանին տարիներով կդատապարտի մեկուսացման, ինչի հետևանքով կաթվածահար կլինի նրա տնտեսությունը, իսկ անվտանգությունը կհայտնվի սպառնալիքի տակ, պնդում է Bloomberg գործակալությունը։
Գործակալության զրուցակիցները, սակայն, հնարավոր չեն համարում, որ Վլադիմիր Պուտինը կփոխի ուղղությունը։ Նրանց խոսքով, Ռուսաստանի նախագահը ավելի ու ավելի է հենվում զիջումների դեմ հանդես եկող խորհրդականների նեղացող շրջանակի վրա և մերժում է իրեն պատերազմի հետևանքների մասին նախազգուշացնելու փորձերը:
Bloomberg-ի երկու աղբյուրներ պնդում են, որ Ուկրաինա ներխուժելու որոշումը կայացրել է Պուտինը մի քանի «գիշատիչների» հետ միասին, որոնց թվում են՝ պաշտպանության նախարար Սերգեյ Շոյգուն, Գլխավոր շտաբի պետ Վալերի Գերասիմովը և ՌԴ Անվտանգության խորհրդի քարտուղար Նիկոլայ Պատրուշևը։
Ներխուժման մեկնարկից հետո մի քանի շաբաթների ընթացքում Պուտինի խորհրդականների և շփումների շրջանակը ավելի շատ է նեղացել կոշտ գծի կողմնակիցների սահմանափակ խմբի համեմատ, որոնց հետ նա պարբերաբար խորհրդակցում էր նախկինում, գրում է պարբերականը:
Ուկրաինայի վրա հարձակումից գրեթե ութ շաբաթ անց ռազմական զոհերն ավելանում են, իսկ Ռուսաստանը բախվել է աննախադեպ միջազգային մեկուսացման: «Կրեմլի բարձրաստիճան ոչ մեծ թվով աղբյուրները, որոնց թիվը, սակայն, գնալով աճում է, լռելյայն կասկածում են պատերազմ սկսելու նրա որոշման իրավացիությանը»,- գրում է գործակալությունը:
0Comments