Genesis-ը ներկայացրել է իր նոր ֆլագմանական էլեկտրական GV90 քրոսովերը, որը պետք է հարավկորեական բրենդը հասցնի իսկական շքեղ ավտոմեքենաների շուկա և մրցակցի Bentley Bentayga-ի ու Rolls-Royce Cullinan-ի հետ, գրում է Autocar-ը։
Գրեթե 5,3 մետր երկարությամբ նոր մոդելը դարձել է Genesis-ի պատմության մեջ ամենամեծ ավտոմեքենան։ GV90-ը չափերով համադրելի է Rolls-Royce Cullinan-ի և Bentley Bentayga-ի երկարացված տարբերակի հետ, իսկ 2027 թվականին եվրոպական շուկա դուրս գալուց հետո կդառնա Եվրոպայում հասանելի ամենամեծ էլեկտրամոբիլը։
Hyundai Motor Group-ի գլխավոր դիզայներ Սան Յոպ Լին, որը նախկինում մասնակցել է Bentley Bentayga-ի ստեղծմանը, GV90-ը անվանել է «կարգավիճակի ավտոմեքենա» և հայտարարել, որ այն, հավանաբար, Genesis-ի առաջին իսկապես շքեղ մոդելն է, այլ ոչ պարզապես պրեմիում դասի ավտոմեքենա։
GV90-ը կառուցված է հատուկ էլեկտրական eMP հարթակի վրա։ 3,245 մետր անիվային բազայի և ամբողջովին հարթ հատակի շնորհիվ սրահը ստացել է հսկայական ներքին տարածություն։ Գնորդները կկարողանան ընտրել յոթտեղանի տարբերակ կամ Neolun քառատեղանի համալրում՝ երկու շքեղ հետևի բազկաթոռներով և պտտվող առջևի նստատեղերով։
Ամենաանսովոր առանձնահատկություններից մեկը կլինեն հետևի դռները, որոնք բացվում են ընթացքի ուղղությանը հակառակ։ Թոփ տարբերակում առջևի և հետևի դռների միջև տեսանելի կենտրոնական սյուն չի լինի։ Թափքի կոշտությունը պահպանելու և առավելագույն անվտանգության մակարդակ ապահովելու համար ինժեներներն ստիպված են եղել զգալիորեն ուժեղացնել կառուցվածքը։
Սրահը նախատեսված է մասնավոր ինքնաթիռի մթնոլորտ ստեղծելու համար․ այստեղ օգտագործվում են բնական քար, փայտ և քաշմիրե բուրդ։ Bang & Olufsen աուդիոհամակարգը բաղկացած է 25 բարձրախոսից և կարող է նմանակել այնպիսի հարթակների ակուստիկան, ինչպիսիք են Բոստոնի սիմֆոնիկ դահլիճը և «Ուեմբլի» մարզադաշտը։
Վարորդի առջև տեղադրված է 25-դյույմանոց պրոյեկցիոն դիսփլեյ, իսկ մուլտիմեդիա համակարգի կենտրոնական էկրանը ունի 23,6 դյույմ անկյունագիծ։ Կայանման ժամանակ այն կարելի է բարձրացնել՝ վերածելով 24,6 դյույմանոց էկրանի՝ տեսանյութեր դիտելու համար։
Էլեկտրամոբիլը կստանա 123,5 կՎտ·ժ տարողությամբ մարտկոց և երկու էլեկտրաշարժիչ՝ 648 ձիաուժ ընդհանուր հզորությամբ։ Հայտարարված ընթացքի պաշարը հասնում է 500 կմ-ի։ 800-վոլտանոց ճարտարապետության շնորհիվ մարտկոցը կարելի է լիցքավորել մինչև 350 կՎտ հզորությամբ․ 10%-ից մինչև 80% այն լիցքավորվում է մոտավորապես 22 րոպեում։
Վաճառքները Հարավային Կորեայում կսկսվեն արդեն հաջորդ ամիս, իսկ եվրոպական շուկայում մոդելը կթողարկվի 2027 թվականի առաջին կեսին։ Գինը դեռ պաշտոնապես չի հայտարարվել, սակայն պատվերները կբացվեն մոտավորապես 115 հազար եվրոյից։ Այսպիսով, GV90-ը կդառնա Genesis-ի ամենաթանկ ավտոմեքենան։