Մաշտոց-Կորյուն խաչմերուկում «Mercedes»-ը դուրս է եկել երթևեկելի հատվածից և բախվել ծառին․ ուղեւորը հոսպիտալացվել է

^{ԱԻՆ «911» ծառայությանն այսօր՝ օգոստոսի 19-ին, ժամը 07:24-ին ահազանգ է ստացվել, որ Երևան քաղաքի Մաշտոցի պողոտայում տեղի է ունեցել ՃՏՊ՝ ավտոմեքենան բախվել է ծառին, կա տուժած, առկա է վառելիքի արտահոսք. անհրաժեշտ է փրկարարների օգնությունը: Այս մասին NEWS.am-ին տեղեկացնում են ԱԻՆ լրատվական ծառայությունից։}

^{Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ և փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական ջոկատը:}

^{Պարզվել է, որ Մաշտոցի պողոտայի և Կորյունի փողոցի խաչմերուկում «Mercedes E350» մակնիշի ավտոմեքենան (վարորդ՝ Սարգիս Մ.) դուրս է եկել ճանապարհի երթևեկելի հատվածից և բախվել ծառին:}

^{Մինչ փրկարարների՝ կանչի վայր հասնելն ուղևորը (Հրակ Ա.-ն, ծնված 1997 թ.) քաղաքացիների ուժերով դուրս է բերվել ավտոմեքենայից և հոսպիտալացվել «Հերացի» թիվ 1 հիվանդանոցային համալիր: Բժիշկները տուժածի առողջական վիճակը գնահատել են կայուն ծանր:}

^{Փրկարարները հոսանքազրկել են ավտոմեքենան և փակել գազի բալոնի փականը:}