ՀՀ–ն մինչև 95% նվազեցրել է պաշտպանական ներկրումների կախվածությունը մեկ աղբյուրից. Միրզոյան
Հայաստանը կատարել է անշրջելի ընտրություն՝ դեպի ժողովրդավարություն, դեպի խաղաղություն, դեպի Եվրոպա։ Այդ մասին այսօր ԵՄ Արևելյան Եվրոպայի և Կենտրոնական Ասիայի դեսպանների տարածաշրջանային հավաքի մեկնարկին իր ելույթի ժամանակ ասել է ՀՀ ԱԳ նախարար Արարատ Միրզոյանը: Տեղեկությունը հայտնում է ՀՀ արտաքին գործերի նախարարության մամուլի ծառայությունը։
Նա ընդգծել է, որ Հայաստանը համարձակ քայլեր է ձեռնարկել իր գործընկերային հարաբերությունները դիվերսիֆիկացնելու ուղղությամբ։ Այս համատեքստում նախարարը նշել է ԱՄՆ հետ համապարփակ Ռազմավարական գործընկերության կանոնակարգի ստորագրումը, ինչպես նաև նշանակալից է համարել ՀՀ իշխանությունների կողմից ակտիվ քայլերի ձեռնարկումը ԵՄ անդամ պետությունների հետ ռազմավարական գործընկերության ընդլայնման ուղղությամբ։
«Հայաստանը մինչև 95% նվազեցրել է պաշտպանական ներկրումների կախվածությունը մեկ աղբյուրից: Զուգահեռաբար, մեր կառավարությունը կարողացել է ավելի ինքնուրույն իրականացնել սահմանային վերահսկողություն, ինչպես նաև դիտարկել էներգետիկ անկախությունն ապահովող այլընտրանքային ուղիներ՝ ներառյալ ատոմային և վերականգնվող էներգիայի ոլորտներում»,– հայտարարել է Միրզոյանը։
Նա անդրադարձել է նաև Հայաստանի և Ադրբեջանի միջև խաղաղության պայմանագրի ստորագրմանը` նշելով, որ ՀՀ իշխանությունները հետևողականորեն ձգտում են Ադրբեջանի հետ համապարփակ և ինստիտուցիոնալացված խաղաղության հաստատման։
«Մինչդեռ դեռևս պարզ չէ` արդյո՞ք Ադրբեջանն ունի անկեղծ մտահոգություններ, թե՞ արհեստականորեն ձգձգում է գործընթացը, բայց փաստն այն է, որ երկու երկրների միջև համաձայնեցված Խաղաղության պայմանագիրը դեռ չի ստորագրվել»,– նշել է ԱԳ նախարարը։
Նա կոչ է արել եվրոպացի գործընկերներին ակտիվացնել իրենց աջակցությունն այս գործընթացին՝ ակնկալելով, որ նրանք հետևողականորեն կընդգծեն Հայաստանի հետ խաղաղության համաձայնագրի անհապաղ ստորագրման անհրաժեշտությունը թե՛ Բաքվի հետ իրենց ուղղակի շփումներում, թե՛ իրենց հրապարակային հայտարարություններում։
Latest from Live24
- ԵՄ-ն 5,5 մլն եվրո կհատկացնի «Ազատություն» ռադիոկայանին
- Լրագրողական կազմակերպությունների համատեղ հայտարարությունը` Տիգրան Հակոբյանի հնչեցրած գնահատականների առնչությամբ
- ԱՄՆ-ն հրաժարվել է Հարավային Աֆրիկայում կայանալիք G20 գագաթնաժողովին մասնակցելուց. Մարկո Ռուբիո
- ԵՄ-ն ցանկանում է մասնակցել Ռուսաստանի և Ուկրաինայի միջև հաջորդ բանակցություններին
- Ուկրաինան պատրաստ է Ռուսաստանի հետ բանակցությունների հաջորդ փուլին․ Զելենսկի
- Լավրովի այցն ու Հանրայինի հակառուսական քարոզչությունը. մասնագետը` ՀՀ քաղաքականության մասին
- Ոստիկանները հեռացրել են Լավրովի այցին ընդառաջ բողոքի ակցիաների կազմակերպիչների փակցրած պաստառները
- Իրանի պաշտպանության և զինված ուժերի աջակցման նախարարն անվանական եղեւնի է տնկել ՊՆ֊ում