Ուկրաինայի զինված ուժերի 909 և Ռուսաստանի զինված ուժերի 43 զոհված զինծառայողի մարմիններ փոխանակվել են Կարմիր խաչի միջազգային կոմիտեի միջնորդությամբ։ Դիակների փոխանցման գործընթացի մասին տեղեկացրել են Ուկրաինայի ռազմագերիների հետ աշխատանքը համակարգող շտաբը և ՌԴ Պետդումայի պատգամավոր Շամսաիլ Սարալիևը։

Ուկրաինական կողմին փոխանցված զինծառայողները զոհվել են Կուրախովեի, Պոկրովսկի, Բախմուտի, Ուգլեդարի, Լուգանսկի և Զապորոժիեի ուղղություններում։ Նրանցից մի մասի մարմինները պահվել են Ռուսաստանի տարածքում գտնվող դիահերձարաններում։ Դիակները նախ կներկայացվեն դատաբժիշկական փորձաքննության՝ ինքնությունը հաստատելու նպատակով, ապա կփոխանցվեն հարազատներին՝ հուղարկավորության համար։