Իսրայելի վարչապետ Բենիամին Նեթանյահուն հայտարարել է, որ իր քաղաքական հակառակորդները փորձում են «գողանալ» խորհրդարանական ընտրությունները։ Իր կողմնակիցներին ուղղված ուղերձում Իսրայելի կառավարության ղեկավարը նշել է, որ քվեարկության օրը արաբաբնակ շրջաններում բարձր մասնակցություն է արձանագրվել, իսկ արաբական կուսակցությունների ներկայացուցիչները, նրա պնդմամբ, փորձում են կաշառել ընտրողներին։
Իսրայելական լրատվամիջոցների տվյալներով՝ Քնեսեթի ընտրություններին մասնակցությունը 1973 թվականից ի վեր ամենաբարձրն է։ Միևնույն ժամանակ, ըստ լրատվամիջոցների, Նեթանյահուի «Լիկուդ» կուսակցության համախոհներն արդեն սկսել են ռազմավարություն մշակել՝ հնարավոր խոշոր պարտության դեպքում։
Նեթանյահուն ընտրություններին վերաբերող մի շարք կոչեր է հրապարակել X սոցիալական ցանցում։ Դրանցից մեկում վարչապետը հայտարարել է, որ երկրի հարավում՝ արաբական համայնքի ներկայացուցիչներով բնակեցված շրջաններում, առավոտյան ձերբակալվել են արաբական ՌԱԱՄ կուսակցության ներկայացուցիչներ, որոնք, նրա խոսքով, եղել են «փողերով լի ծրարներով»։
«Փորձում են գողանալ մեր ընտրությունները», — հայտարարել է Իսրայելի կառավարության ղեկավարը։
Նա դժգոհություն է հայտնել այն կապակցությամբ, որ արաբաբնակ շրջաններում ընտրողների մասնակցությունը զգալիորեն բարձր է, քան հրեական բնակչությամբ շրջաններում։ Վարչապետը կոչ է արել իր ընտրողներին մի կողմ դնել բոլոր գործերը և ընտանիքի անդամների, ընկերների ու հարևանների հետ գնալ ընտրատեղամասեր՝ քվեարկելու «Լիկուդ» կուսակցության և նրա դաշնակիցների օգտին։
«Կշեռքի նժարին մեր հրեական պետության պաշտպանությունն է։ Կլինի՞ ուժեղ աջակողմյան կառավարություն՝ «Լիկուդի» և մեր բոլոր դաշնակիցների գլխավորությամբ, թե՞ ձախակողմյան կառավարություն՝ արաբական կուսակցությունների մասնակցությամբ, որը վերջ կդնի Իսրայել պետությանն այնպես, ինչպես մենք այն գիտենք», — ընդգծել է Նեթանյահուն։
Պաշտոնական տվյալներով՝ տեղական ժամանակով ժամը 14։00-ի դրությամբ Իսրայելում ընտրատեղամասեր էր այցելել ընտրողների 44,9 տոկոսը։ Սա 1973 թվականից ի վեր ամենաբարձր ցուցանիշն է։ Ընտրողների բարձր ակտիվություն է արձանագրվել գրեթե բոլոր սոցիալական խմբերում, բացառությամբ ծայրահեղ ուղղափառ համայնքի, որտեղ սոցիոլոգները նկատել են քվեարկության նկատմամբ ցածր հետաքրքրություն։