Չորեքշաբթի՝ օգոստոսի 12-ի երեկոյան, արևի խավարման դիտումը Բրեմենում հանգեցրել է լուրջ տրանսպորտային խնդիրների և պահանջել ոստիկանության լայնածավալ միջամտություն, հայտնում է Spiegel-ը։
Հարյուրավոր բնակիչներ և քաղաքի հյուրեր հավաքվել էին Բրեմենի հյուսիսային Վալլե շրջանում՝ հույս ունենալով խավարումը դիտել հայտնի տեսադիտակետից։ Ավտոմեքենաների մեծ քանակի պատճառով լայնածավալ խցանումներ են առաջացել, որոնք մի պահ հասել են նույնիսկ A27 ավտոմայրուղուն։ Ոստիկանության տվյալներով՝ որոշ հատվածներում երթևեկությունն ամբողջությամբ կաթվածահար էր եղել։
Որոշ վարորդներ ավտոմեքենաները թողնում էին հենց ավտոմայրուղու և արագընթաց ճանապարհների վրա։ Ընդհանուր առմամբ, ոստիկանությունը գրանցել է ճանապարհային երթևեկության կանոնների ավելի քան 110 խախտում, որոնցից մոտ 80-ը կապված էին ավտոմայրուղու կամ արագընթաց մայրուղու վրա ապօրինի կայանման հետ։
Ոստիկանության աշխատակիցներին նաև բազմիցս ստիպված է եղել կանխել վարորդների՝ ավտոմայրուղու հանդիպակաց ուղղությամբ դուրս գալու փորձերը։ Փողոցներում միաժամանակ կուտակվել էին ավտոմեքենաներ, հեծանվորդներ և հետիոտներ, ինչն ավելի էր բարդացնում երթևեկությունը։
Ոստիկանությունում նշել են, որ տրանսպորտային կոլապսի պատճառը մեծ թվով մարդկանց՝ այս հազվադեպ երկնային երևույթը դիտելու համար հարմար վայր գտնելու ձգտումն էր։