Օգոստոսի 4-ի առավոտյան ուկրաինական անօդաչուները նոր հարված են հասցրել Սամարայի մարզում գտնվող Սիզրանի նավթավերամշակման գործարանին։ Գործարանը ևս մեկ անգամ արդեն թիրախավորվել էր հուլիսի կեսերին։ Այս մասին հայտնում են ուկրաինական Supernova և Exilenova+ մոնիթորինգային ռեսուրսները։ Ըստ հաղորդումների՝ հրդեհ է բռնկվել տարեկան շուրջ 800 հազար տոննա բենզին և 1,5 միլիոն տոննա դիզելային վառելիք արտադրող ՆՎԳ-ում (որի ընդհանուր տարեկան հզորությունը 8,5 միլիոն տոննա է)։ Ալիքները հրապարակել են լուսանկարներ, որտեղ, ենթադրաբար, գործարանի վրա բարձրացող ծխի սյուն է երևում։ Իշխանությունները հարձակման փաստը պաշտոնապես դեռ չեն հաստատել, իսկ ՌԴ Պաշտպանության նախարարության առավոտյան տեղեկագրում չի հիշատակվել Սամարայի մարզը։ Գիշերը տարածաշրջանում ԱԹՍ-ների վտանգ է հայտարարվել։ Հուլիսի 12-ի հարվածից հետո Սիզրանի ՆՎԳ-ն ստիպված է եղել դադարեցնել վերամշակումը՝ սարքավորումներից մեկի վնասման պատճառով։
Տվերի մարզում անօդաչուները թիրախավորել են Wildberries-ի՝ 77 հազար քմ մակերեսով պահեստը, հայտնել է նահանգապետ Վիտալի Կորոլյովը։ Նրա խոսքով՝ գիշերային հարձակումը հետ մղելիս «անօդաչուի բեկորներից մասնակիորեն վնասվել է ընկերության պահեստի պատը»։ Խոսքը Տվերի արևելյան ծայրամասում՝ Կալինինի շրջանում գտնվող հաբի մասին է, որի տարածքում «առավոտյան ժամը երեքից ի վեր շատ աղմկոտ է»։ Տարածաշրջանի ղեկավարը վստահեցրել է, որ տուժածներ չկան։ «Осторожно, Тверь» ալիքը տեսանյութ է հրապարակել, որտեղ երևում է, թե ինչպես են մարդիկ փախչում պահեստի տարածքից։ Նշվում է, որ 2025 թվականի դեկտեմբերին շահագործման հանձնված պահեստը ժամանակավորապես դադարեցրել է աշխատանքը, իսկ աշխատակիցները էվակուացվել են։ Բացի այդ, երեքշաբթի օրը հարվածների են ենթարկվել Մոսկվայի մարզի Չեխով քաղաքում և Լենինգրադի մարզի Կրասնի Բորում գտնվող Wildberries-ի պահեստները։