Չինաստանը հավանություն է տվել GLP-1 ռեցեպտորների ագոնիստների հիմքով քաշի նվազեցման առաջին դեղահաբին։
Ամերիկյան Eli Lilly դեղագործական ընկերությունը ստացել է օրզորգլիպրոնը Muyouda առևտրային անվանմամբ վաճառելու թույլտվություն։ Դեղամիջոցը նախատեսված է ճարպակալում կամ ավելորդ քաշ ունեցող մեծահասակների համար, որոնք ունեն մարմնի քաշի հետ կապված առնվազն մեկ ուղեկցող հիվանդություն։
Չինաստանի դեղերի վերահսկողության պետական վարչությունը հաստատման մասին հայտարարել է հինգշաբթի։ Դեղամիջոցն ընդունվում է խմելու միջոցով, օրական մեկ անգամ։ ԱՄՆ-ում այն հաստատվել է ապրիլին։
GLP-1 դասի դեղամիջոցները նմանակում են աղիներում արտադրվող բնական հորմոնի ազդեցությունը, որը կարգավորում է արյան մեջ շաքարի մակարդակը և ճնշում ախորժակը՝ նպաստելով քաշի նվազեցմանը։ Վերջին տարիներին նման դեղամիջոցները մեծ տարածում են գտել, դեղագործական ընկերություններն ակտիվորեն մշակում են հաբային ձևեր՝ որպես ներարկումների այլընտրանք։
Eli Lilly-ն առաջ է անցել մրցակիցներից, այդ թվում՝ Wegovy դեղամիջոցն արտադրող դանիական Novo Nordisk-ից՝ դառնալով առաջին ընկերությունը, որը Չինաստանում ստացել է այս դասի՝ խմելու միջոցով ընդունվող քաշի նվազեցման դեղամիջոցի վաճառքի թույլտվություն։ Միաժամանակ, Eli Lilly և Novo Nordisk ընկերությունների, ինչպես նաև չինական Innovent-ի GLP-1 ներարկային դեղամիջոցներն արդեն լայնորեն հասանելի են տեղական շուկայում։
Չինաստանում քաշի նվազեցման միջոցների շուկան արագ աճում է ավելորդ քաշի և ճարպակալման տարածման ֆոնին։ Ըստ 2025 թվականին The Lancet ամսագրում հրապարակված հետազոտության՝ մինչև 2050 թվականը ավելորդ քաշ կամ ճարպակալում ունեցող չափահաս չինացիների թիվը կարող է հասնել 630 միլիոնի։ Այս մասին news.am-ի փոխանցմամբ՝ հայտնել է Medical Xpress-ը։
Չինաստանի առողջապահության ազգային հանձնաժողովը նույնպես նախազգուշացրել է, որ մինչև 2030 թվականը երկրի բնակչության 65 տոկոսը կարող է ունենալ ավելորդ քաշ կամ ճարպակալում։