ԱՄՆ միջանկյալ ընտրությունների արդյունքները հարցականի տակ են դրել մի շարք նախարարների և Սպիտակ տան բարձրաստիճան աշխատակիցների կարիերան, հայտնել է Financial Times թերթը։
Ինչպես գրել է թերթը, ռիսկի գոտում են հայտնվել, մասնավորապես, պատերազմի նախարար Փիթ Հեգսեթը, պետքարտուղար Մարկո Ռուբիոն և փոխնախագահ Ջեյ Դի Վենսը։
Հեգսեթը ռիսկի խմբում է, քանի որ հենց նրան են համարում ԱՄՆ-ի և Իրանի միջև ռազմական հակամարտության «դեմքը»։ Բացի այդ, գերատեսչությունում նրա իրականացրած կադրային զտումները և Կոնգրեսի հետ հակամարտությունները շատերին են տրամադրել նրա դեմ, այդ թվում՝ Հանրապետական կուսակցության նրա գործընկերներին։
Մյուս խոցելի գործիչների թվում FT-ն նշել է փոխնախագահ Ջեյ Դի Վենսին, որը համարվում էր 2028 թվականին ԱՄՆ նախագահի թեկնածու առաջադրվելու գլխավոր հավակնորդը և որը ընտրությունների արդյունքներից հետո հրապարակավ հեռավորություն պահեց Սպիտակ տնից։
Ցանկում է նաև պետքարտուղար Մարկո Ռուբիոն, որի շուրջ լուրեր են շրջանառվում 2028 թվականի նախագահական քարոզարշավին մասնակցելու նպատակով հնարավոր հեռանալու մասին։ Financial Times-ը նշել է նաև ֆինանսների նախարար Սքոթ Բեսենթին՝ ԱՄՆ-ում գների և հիպոտեկային տոկոսադրույքների աճի պատճառով, ինչպես նաև առողջապահության նախարար Ռոբերտ Քենեդի կրտսերին՝ առողջապահական բարեփոխման պատճառով, որը հանրապետականներին չօգնեց ընտրություններում։
Թերթը նաև մատնանշել է Սպիտակ տան աշխատակազմի ղեկավար Սյուզան Ուայլսին, քանի որ նա չի կարողացել վերահսկողության տակ պահել պատերազմի, գնաճի և Վաշինգտոնի բարեկարգման նախագծերի մասին հաղորդագրությունների տարածումը։ Նրա հասցեին արդեն հրաժարական տալու կոչեր են հնչում։
Ավելի վաղ ԱՄՆ փոխնախագահ Ջեյ Դի Վենսը հայտարարել էր, որ Իրանի դեմ ռազմական գործողությունները դարձել են միջանկյալ ընտրություններում Հանրապետական կուսակցության պարտության առանցքային գործոնը, ինչի հետևանքով կուսակցությունը կորցրել է մեծամասնությունը Կոնգրեսի երկու պալատներում։