Ֆրանսիայի մի քանի քաղաքներում ուսանողական բողոքի ակցիաներ են անցկացվել՝ ցույցերի իրավունքի շուրջ վեճերի և կրթության ֆինանսավորումն ավելացնելու պահանջների ֆոնին։ Ցույցերը տեղի են ունեցել Նանտում, Մարսելում, Լիոնում, Գրենոբլում և Լիլում, գրում է Le Monde-ը։
Նանտում փողոցներ են դուրս եկել մոտ 400 ուսանող և ավագ դպրոցի աշակերտ։ Մասնակիցները «Ժողովուրդը կուշտ է» և «Ապստամբել նշանակում է մտածել» կարգախոսներով ցուցապաստառներ են կրել։
Մարսելում մոտ հարյուր ավագ դպրոցի աշակերտ անցել է Կանեբյերով՝ քաղաքի գլխավոր փողոցներից մեկով, զբաղեցնելով տրամվայի գծերը։ Նրանք վանկարկել են՝ «Թանկը կրթությունը չէ, այլ բանակն ու պատերազմը» կարգախոսը։ Մասնակիցների շրջանում նկատելի էին կոմունիստական երիտասարդական կազմակերպությունների և CNT անարխիստական արհմիության դրոշները։
Լիոնում մոտ 300 երիտասարդ, հիմնականում ուսանողներ, հավաքվել են Interfac շարժման ընդհանուր ժողովին՝ Աշխատանքի բորսայի շենքում։ Իշխանությունները արգելել էին հարակից հրապարակում հանրահավաք անցկացնել, իսկ ոստիկանությունը փաստաթղթերի ստուգումներ էր իրականացնում։
Գրենոբլում, որտեղ քաղաքի կենտրոնում ցույցերն արգելված էին հինգշաբթիից մինչև կիրակի առավոտյան ժամը վեցը, մի քանի հարյուր ուսանող հավաքվել է ծայրամասում գտնվող համալսարանական ավանում, ապա շարժվել դեպի կենտրոն։ Նրանք մտադիր էին հասնել կրթության տարածաշրջանային վարչության շենք, որը գտնվում է արգելված գոտում։ Ոստիկանությունը կանգնեցրել է երթը կենտրոնի մուտքի մոտ։ Իսկ երբ մասնակիցները փորձել են ճեղքել ոստիկանական շղթան, ուժայինները հետ են մղել ամբոխին՝ կիրառելով արցունքաբեր գազ և կարճ ժամանակով անցնելով գրոհի։
Լիլում մոտ հարյուր ուսանող, ավագ դպրոցի աշակերտ և դասախոս անցկացրել է համաձայնեցված ակցիա՝ ավանդական երթուղով։ Նրանք հանդես էին գալիս նախագահ Էմանուել Մակրոնի քաղաքականության և ոստիկանության գործողությունների դեմ՝ համերաշխության և համազգային գործադուլի կոչ անելով։