Թուրքիան, Կատարը, Ինդոնեզիան և Պակիստանը ստորագրել են «Բադր» հուշագիրը՝ ընդլայնելու պաշտպանական համագործակցությունը և զարգացնելու ռազմավարական գործընկերությունը, հաղորդում է Anadolu-ն՝ հղում անելով Թուրքիայի պաշտպանության նախարարությանը։
Փաստաթուղթը Դոհայում ստորագրել են չորս երկրների պաշտպանության նախարարներն ու նրանց ներկայացուցիչները։ Թուրքիան ներկայացրել է ազգային պաշտպանության նախարար Յաշար Գյուլերը, Կատարը՝ փոխվարչապետ և պաշտպանության հարցերով պետական նախարար շեյխ Սաուդ բին Աբդուլռահման բին Հասան Ալ Թանին, Ինդոնեզիան՝ պաշտպանության փոխնախարար Յուսուֆ Ջաուհարին, Պակիստանը՝ պաշտպանության նախարար Խավաջա Մուհամմադ Ասիֆը։ Արարողությանը մասնակցել է նաև Թուրքիայի պաշտպանական արդյունաբերության վարչության ղեկավար Հալուք Գյորգյունը։
Հուշագիրը, որի անվանումը թարգմանվում է որպես «լիալուսին», նախատեսում է համագործակցություն ռազմական տեխնիկայի արտադրության, պաշտպանական ներուժի ամրապնդման, զինծառայողների տեխնիկական պատրաստության, գիտական հետազոտությունների և նոր տեխնոլոգիաների մշակման ոլորտներում։ Մասնակիցների մտահղացմամբ՝ արտադրական հնարավորությունների միավորումը հնարավորություն կտա զարգացնել ազգային պաշտպանական ճյուղերը, բարձրացնել համակարգերի համատեղելիությունը և արտադրանք ստեղծել դաշնակից ու բարեկամ երկրների կարիքների համար։
Թուրքական նախարարությունում հայտարարել են, որ համաձայնագիրը կոչված է ընդլայնելու բազմակողմ ռազմական համագործակցությունը և ամրապնդելու փոխգործակցությունը պաշտպանական արդյունաբերության ոլորտում՝ անվտանգության և կայունության ապահովման համար։