Փարիզի անկարգությունների ժամանակ թալանված Hermès-ի, Louis Vuitton-ի և Celine-ի պայուսակները հայտնվել են վերավաճառքի Vinted հարթակում։ Bloomberg-ի հաղորդմամբ՝ հարթակում ավելացել են կասկածելի հայտարարությունները։
Ֆրանսիայի թվային հարցերով նախարար Անն Լը Հենանֆը պահանջել է անհապաղ հեռացնել գողացված ապրանքների վաճառքի հայտարարությունները։ Vinted-ը հայտնել է, որ արդեն միջոցներ է ձեռնարկել դրանք հեռացնելու և կասկածելի հաշիվներն արգելափակելու ուղղությամբ։
Ապրանքների վերավաճառքի փորձագետ Գրեհեմ Վեթզբարգերը զգուշացրել է, որ անկարգություններից հետո հարթակից գնումներ կատարած մարդիկ կարող են անգիտակցաբար գողացված պայուսակ ձեռք բերած լինել։ Նա գնորդներին խորհուրդ է տվել ստուգել ապրանքների ծագումը։