Անցյալ ամիս Հունաստանից կատարվող թռիչքից կարճ ժամանակ անց Ryanair-ի ինքնաթիռում մետաղական բեկորների արտանետման պատճառ է դարձել շարժչի օդափոխիչի վնասված թիակը։ Բեկորները ծակել են իլյումինատորը, առաջացած բացվածքի մեջ մասամբ ներքաշվել է ուղևորի գլուխը, ուղեկիցները կարողացել են նրան կրկին ներս քաշել սրահ, հայտնել է ԱՄՆ Տրանսպորտի անվտանգության ազգային խորհուրդը (NTSB)։
Քննության հաշվետվության համաձայն՝ վնասված շարժչի բեկորները կոտրել են ապակեպատ պատուհանը և վնասել ֆյուզելյաժի այլ հատվածներ։ Արտակարգ դեպքը տեղի է ունեցել հուլիսի 10-ին հյուսիսային Սալոնիկ քաղաքից կատարվող թռիչքից կարճ ժամանակ անց, հայտնել է Independent-ը։
Շարժչի հանգույցի ներսում NTSB-ի մասնագետները հայտնաբերել են թռչունների մնացորդներ, ինչը վկայում է բարձրության սկզբնական հավաքման ժամանակ թռչնի հետ հնարավոր բախման մասին։
11-րդ շարքում պատուհանի մոտ նստած 61-ամյա տղամարդը ստացել է քերծվածքներ և շփումից առաջացած այրվածքներ, ինչպես նաև պարանոցի և ուսի վնասվածքներ այն բանից հետո, երբ նա գրեթե դուրս էր նետվել։ Մոտակայքում գտնվող ուղևորները համատեղ ջանքերով նրան ներս են քաշել Boeing 737-800-ի սրահ։
Օդանավի անձնակազմի անդամները քննիչներին հայտնել են ուժեղ, չդադարող թրթռման և խցիկում մառախուղի կամ ծխի հայտնվելու մասին՝ նախքան առաստաղի կոնսոլներից թթվածնի դիմակների ընկնելը։
Սալոնիկում ինքնաթիռի արտակարգ վայրէջքից հետո տուժածին ցուցաբերվել է բժշկական օգնություն։
NTSB-ն հրապարակային խիստ քննադատությամբ է հանդես եկել Ryanair-ի գլխավոր տնօրեն Մայքլ Օ’Լիրիի հասցեին։ Պատճառը նրա հայտարարություններն էին ներդրողների համար, ըստ որոնց՝ հետաքննությունն իբր կենտրոնացած է բացառապես օտար առարկաների պատճառած վնասման, ոչ թե տեխնիկական սպասարկման գրառումների կամ ինքնաթիռի տարիքի վրա։
Դաշնային քննիչներն ընդգծել են, որ հնարավոր գործոններից առայժմ ոչ մեկը բացառված չէ, իսկ Օ’Լիրին լիազորված չէ հայտարարություններ անել քննության անունից։
Տեխնիկական սպասարկման գրառումների համաձայն՝ աջ շարժչի օդափոխիչի թիակներն անցել են ուլտրաձայնային ստուգում 2025 թվականի նոյեմբերին և 2026 թվականի մայիսին, և որևէ թերություն չի հայտնաբերվել։
Այնուամենայնիվ, NTSB-ն նշել է, որ նախորդ 12 ամիսների ընթացքում անձնակազմերը հայտնել են հենց այս շարժչի մասնակցությամբ թռչունների հետ հնարավոր չորս բախումների մասին (երկու դեպքում թռչունների մնացորդները հաստատվել են)։
Օդանավը (որը շահագործվում էր Malta Air դուստր ավիաընկերության կողմից) Ryanair ընկերությանը մատակարարվել էր որպես նոր 2008 թվականին։ Ինքնաթիռը թռիչքից մոտ մեկ ժամ անց բարեհաջող վերադարձել է օդանավակայան։