Մազերի գույնը և դեմքի շուրջ եղած ֆոնը կարող են ազդել այն բանի վրա, թե որքան հարթ և գրավիչ է թվում մաշկը, նույնիսկ եթե հենց մաշկի հետ ոչինչ չի փոխվում։ Այս եզրակացությանն են եկել Ֆրանկլին և Մարշալ քոլեջի հետազոտողները, որոնք ուսումնասիրել են կոնտրաստի ազդեցությունը արտաքինի ընկալման վրա։
Հետազոտության արդյունքները հրապարակվել են Perception ամսագրում։
Առաջին փորձի ընթացքում մասնակիցներին ցույց էին տալիս տարբեր գույների օվալներով շրջապատված դեմքեր։ Մի դեպքում ֆոնի գույնը խիստ հակադրվում էր մաշկի երանգին, մյուսում՝ կոնտրաստը թույլ էր։ Ընդ որում, դեմքերի պատկերներն ինքնին չէին փոխվում։
Չնայած դրան՝ մասնակիցները մաշկը գնահատում էին որպես ավելի հարթ, երբ դեմքը շրջապատված էր բարձր կոնտրաստ ունեցող ֆոնով։
Երկրորդ փորձի ընթացքում հետազոտողները ստուգել են, թե արդյոք էֆեկտը պահպանվում է ավելի իրատեսական իրավիճակում։ Նրանք փոխում էին միայն դեմքերի պատկերների մազերի բացությունը։ Մինչդեռ մաշկը մնում էր բացարձակապես անփոփոխ։ Սակայն ավելի մուգ մազերով դեմքերն ընկալվում էին որպես ավելի հարթ մաշկ ունեցող, քան բաց մազերով դեմքերը։
«Մաշկի արտաքին տեսքը կախված է մաշկի և դեմքը շրջապատող մակերեսների միջև եղած կոնտրաստից՝ լինի դա ֆոնի, թե մազերի գույնը», — նշել է հետազոտության ղեկավար, հոգեբանության պրոֆեսոր Կարլոտա Բատրեսը։
Հեղինակները ենթադրում են, որ այս էֆեկտը կարող է մասամբ բացատրել գրավչության վերաբերյալ նախորդ հետազոտությունների արդյունքները։ Օրինակ՝ սև հագուստը նախկինում գնահատվել էր որպես գրավչությունն ավելի շատ բարձրացնող, քան կարմիր, կապույտ, կանաչ, դեղին և սպիտակ գույների հագուստը։ Մինչ այժմ դա հիմնականում կապում էին սև գույնի՝ որպես ավելի նորաձև ընկալվելու հետ։ Սակայն նոր փորձը ցույց է տալիս, որ դեր կարող է խաղալ նաև դրա ստեղծած կոնտրաստը, որը տեսողականորեն մաշկն ավելի հարթ է դարձնում։
Նույն պատճառով կարող է փոխվել գրավչության ընկալումը մազերի տարբեր երկարության և հարդարման դեպքում։ Նախորդ հետազոտությունները ցույց էին տվել, որ բաց թողնված մազերով և միջին կամ մեծ երկարության մազերով կանայք ստանում են գրավչության ավելի բարձր գնահատականներ, քան կարճ կամ հավաքված մազերով կանայք։ Նոր արդյունքը ենթադրում է, որ բացատրություններից մեկը կարող է լինել դեմքի շուրջ մազերի և մաշկի միջև կոնտրաստի մեծացումը։
Այսպիսով, մաշկի վիճակի ընկալումը կախված է ոչ միայն դրա իրական արտաքին տեսքից։ Մազերի, հագուստի և ֆոնի հետ եղած կոնտրաստը կարող է ստեղծել ավելի հարթ մաշկի տեսողական էֆեկտ և դրանով ազդել մարդու գրավչության ընդհանուր գնահատականի վրա։