Իսրայելն այս շաբաթ ԱՄՆ-ին տեղեկացրել է, որ Իրանի հետ շարունակվող հակամարտության պատճառով բալիստիկ հրթիռների կալանման միջոցների օրհասական պակաս ունի։ Այս մասին հայտնում է Semafor ամսագիրը՝ հղում անելով ԱՄՆ պաշտոնյաներին։
Հաղորդվում է, որ Իսրայելը ներկայիս պատերազմի մեջ է մտել կալանող հրթիռների փոքր քանակությամբ, որոնք արձակվել էին անցյալ ամառ Իրանի հետ հակամարտության ժամանակ։ Իսրայելի հեռահար պաշտպանության համակարգը ենթարկվել է Իրանի հարձակումներին։ Ըստ լրատվամիջոցների, Իրանն իր հրթիռներին ավելացնում է կասետային զինամթերք, ինչը կարող է սրել պաշարների սպառումը։
Ամերիկացի պաշտոնյաներից մեկն ասել է, որ ԱՄՆ-ն արդեն մի քանի ամիս է՝ գիտի Իսրայելի ցածր ներուժի մասին։ «Սա այն է, ինչ մենք ակնկալում էինք»,- նշել է նա։
Պաշտոնյան Semafor-ին տված հարցազրույցում ընդգծել է, որ ԱՄՆ-ն իր սեփական կալանող հրթիռների այնքան էլ մեծ պակաս չունի։ Պարզ չէ՝ արդյոք ԱՄՆ-ն կձգտի վաճառել կամ Իսրայելի հետ կիսվել իր սեփական հրթիռներով, ինչն ինքնին ծանրաբեռնվածություն կստեղծի ներքին մատակարարումների համար։ Նախկինում ԱՄՆ-ն Իսրայելին տրամադրվող ռազմական օգնության ծրագրերում ներառել է հակահրթիռային պաշտպանության միջոցներ։
«Մենք ունենք այն ամենը, ինչ անհրաժեշտ է տարածաշրջանում մեր բազաները, անձնակազմը և շահերը պաշտպանելու համար»,- ասել է ամերիկացի պաշտոնյան՝ հավելելով, որ Իսրայելը «լուծումներ է փնտրում» դրանց պակասը լրացնելու համար։
Պատերազմի ժամանակ Իրանի հրթիռներից պաշտպանվելու այլ միջոցներ ևս Իսրայելն ունի, այդ թվում՝ կործանիչների օգնությամբ, սակայն կալանող սարքերը հեռահար հարվածներից պաշտպանվելու ամենաարդյունավետ միջոցներից են։ «Երկաթե գմբեթ» հակահրթիռային պաշտպանության համակարգը նախատեսված է ավելի փոքր հեռավորության հարվածները հետ մղելու համար։
Այս ամսվա սկզբին նախագահ Դոնալդ Թրամփը հայտարարել էր, որ ԱՄՆ-ն ունի զինամթերքի «գործնականում անսահմանափակ» պաշարներ, թեև վերլուծաբանները վաղուց են ասում, որ ԱՄՆ-ի պաշարներն ավելի քիչ են, քան կցանկանային զինվորականները։
Ըստ Center for Strategic and International Studies-ի, անցյալ տարվա հունիսին Իրանի հետ 12-օրյա պատերազմի ժամանակ ԱՄՆ-ն արձակել է ավելի քան 150 THAAD կալանող հրթիռ, ինչն, ինչպես կարծում են, այն ժամանակ կազմում էր ԱՄՆ-ի պաշարների մոտ մեկ քառորդը։
Որոշ տվյալներով՝ այս պատերազմի առաջին հինգ օրվա ընթացքում ԱՄՆ-ն օգտագործել է նաև շուրջ 2,4 միլիարդ դոլարի Patriot կալանող հրթիռներ։ Հունվարին Պենտագոնը քայլեր է ձեռնարկել THAAD հակահրթիռային պաշտպանության համակարգերի արտադրությունն էականորեն ավելացնելու ուղղությամբ։
Ամերիկացի պաշտոնյան հայտարարել է, որ վարչակազմն ունի մեծ քանակությամբ THAAD համակարգեր և կործանիչներ, ինչպես նաև միջին մակարդակի կալանող սարքեր։ Պենտագոնի գլխավոր ներկայացուցիչ Շոն Պարնելը Semafor-ին տված հայտարարության մեջ նշել է, որ գերատեսչությունն «ունի այն ամենը, ինչ անհրաժեշտ է ցանկացած պահի և ցանկացած վայրում ցանկացած առաքելություն կատարելու համար», որը կընտրի Թրամփը։
Այս նյութի հրապարակումից հետո արված հայտարարության մեջ Սպիտակ տան մամուլի քարտուղար Քերոլայն Լիվիթը Semafor-ին ասել է, որ ԱՄՆ-ի պաշարները «լիովին բավարար են» Իրանի նկատմամբ և «դրանից դուրս» Թրամփի նպատակներին հասնելու համար։
Նա հավելել է, որ ԱՄՆ նախագահը նաև միշտ «կենտրոնացած է մեր զինված ուժերի հզորացման վրա և կշարունակի կոչ անել պաշտպանական կապալառուներին» արագորեն ամերիկյան արտադրության զենք ստեղծել։
«Միացյալ Նահանգների զինված ուժերի և Իսրայելի պաշտպանության բանակի ձեռքբերումներն ինքնին խոսում են իրենց մասին. իրանական անօդաչու թռչող սարքերի հարձակումների թիվը նվազել է 95 տոկոսով, բալիստիկ հրթիռների հարձակումների թիվը՝ 90 տոկոսով, իսկ վարչակարգի ողբալի վիճակը միայն վատթարանալու է»,- ասել է նա։