Հարավկորեական Samsung ընկերությունը նախատեսում է էական փոփոխություններ կատարել իր ապագա սմարթֆոնների դիզայնում՝ վերանայելով տեսախցիկի կառուցվածքը։ Այս մասին հայտնում են տեխնոլոգիական աղբյուրները՝ նշելով, որ ընկերությունը տարիներ շարունակ պահպանել է նույն ուղղահայաց դասավորությունը, սակայն առաջիկա մոդելներում սպասվում են փոփոխություններ։
Տեղեկությունների համաձայն՝ Galaxy S27 սերիայի սարքերում կարող են հայտնվել ներկառուցված մագնիսներ, որոնք կօգնեն արագ անլար լիցքավորմանը և կթույլատրեն օգտագործել տարբեր աքսեսուարներ։ Սակայն ներկայիս ուղղահայաց տեսախցիկը կարող է խանգարել այդ տեխնոլոգիայի տեղադրմանը, ինչի պատճառով ընկերությունը ստիպված է վերանայել օբյեկտիվների դասավորությունը։
Չի բացառվում, որ Samsung-ը անցնի հորիզոնական դասավորության, ինչպես որոշ այլ արտադրողներ։ Միևնույն ժամանակ, ընկերությունում ավելի վաղ նշել էին, որ ուղղահայաց տեսախցիկը դարձել է իրենց սարքերի հիմնական առանձնահատկություններից մեկը, ինչը նշանակում է, որ սպասվող փոփոխությունը կարող է լինել ամենանշանակալից դիզայնային շրջադարձերից մեկը վերջին տարիներին։