ԱՄՆ-ում բնակվող Իրանի տապալված շահի որդին՝ Ռեզա Փահլավին, շաբաթ օրը իրանցիներին կոչ է արել անցնել ավելի նպատակաուղղված բողոքի գործողությունների՝ նպատակ ունենալով գրավել և վերահսկողության տակ պահել քաղաքային կենտրոնները, հայտնում է Reuters-ը:

«Մեր նպատակն այլևս պարզապես փողոց դուրս գալը չէ: Նպատակն է պատրաստվել քաղաքային կենտրոնների գրավմանը և դրանց պահպանմանը», - սոցիալական ցանցերում տեղադրված տեսաուղերձում հայտարարել է Ռեզա Փահլավին:

Նա նաև կոչ է արել շաբաթ և կիրակի օրերին իրականացնել բողոքի նոր գործողություններ՝ հավելելով, որ ինքն օրերից մի օր նույնպես «պատրաստվում է վերադառնալ հայրենիք», ինչն իր կարծիքով «շատ մոտ է»:

Հունվարի 8-ին Իրանում տեղի են ունեցել բողոքի երթեր՝ 1979 թվականին տապալված իրանական շահի ժառանգորդ Ռեզա Փահլավիի կոչից հետո: Չնայած սոցիալական ցանցերում տարածված լայնածավալ և զանգվածային ակցիաների տեսանյութերին, իրանական Fars գործակալությունը պնդել է, որ ելույթները «սահմանափակ» բնույթ են կրել: Երկրում բողոքի շարժման ակտիվացման ֆոնին անջատվել են ինտերնետը, բջջային և քաղաքային հեռախոսակապը:

IRIB գործակալությունն ավելի վաղ հայտնել է, որ բողոքի ակցիաների ընթացքում տուժել են մասնավոր սեփականությունն ու քաղաքային ենթակառուցվածքները. ոչնչացվել են տրանսպորտային միջոցներ, այդ թվում՝ շտապօգնության մեքենաներ և քաղաքային ավտոբուսներ, վնաս են հասցվել մետրոյի կայարաններին, մզկիթներին, բանկերին և խանութներին:

Իրանական լրատվամիջոցները հայտնել են նաև անկարգությունների ընթացքում զոհերի և վիրավորների մասին: