Կարակասում տեղի ունեցած ցույցի ժամանակ Վենեսուելայի նախագահը հավատարմության երդում է տվել Վենեսուելայի ժողովրդին՝ հավատացնելով, որ երբեք չի հիասթափեցնի նրանց

«Վենեսուելան անցել է 22 շաբաթ տևած ագրեսիայի միջով, որը կարելի է բնութագրել հոգեբանական ահաբեկչություն։ Բնակչության ավելի քան 94%-ը մերժում և դատապարտում է ​​ռազմական սպառնալիքը, և երկրի 200,000-անոց բանակը պատրաստ է պաշտպանել երկիրը», - հայտարարել է Մադուրոն։

Այս տարվա սեպտեմբերից ի վեր Միացյալ Նահանգները, կուտակելով զգալի ռազմական ուժեր Կարիբյան ծովում, հարվածներ է հասցնում նավերին, ենթադրաբար՝ թմրանյութերի ապօրինի շրջանառության դեմ պայքարի շրջանակներում:

Միևնույն ժամանակ, լրատվամիջոցների հաղորդագրությունների համաձայն, ԱՄՆ-ն Վենեսուելայում պատրաստվում է ցամաքային գործողություն Մադուրոյին տապալելու համար: Նոյեմբերի 21-ին Դոնալդ Թրամփը կոչ է արել Նիկոլաս Մադուրոյին մինչև նոյեմբերի 28-ը ընտանիքի հետ լքել երկիրը: Նոյեմբերի 29-ին Թրամփը հայտարարել է Վենեսուելայի օդային տարածքի փակման մասին: