Hyundai Motor-ը տարածել է բիզնես դասի Grandeur/Azera սեդանի թարմացված տարբերակի առաջին պաշտոնական լուսանկարները։
Հիշեցնենք, որ ներկայիս սերնդի GN7 մոդելը արտադրվում է 2022 թվականից։
Grandeur-ի արտաքին տեսքը թարմացվել է նոր բամպերների և փոփոխված լուսատեխնիկայի օգնությամբ։ Օդամուտքը փոխվել է իր կոնֆիգուրացիայով և մեծացել է մակերեսով, այն ստացել է արծաթագույն եզրագիծ։ Մոտ և հեռու լույսերի բլոկները դարձել են ավելի նեղ։ Հետևի մասում ոչ միայն փոխվել է բամպերի ձևը, այլև կիրառվել են այլ լապտերներ՝ դրանք նախկիններից փոքր-ինչ ավելի լայն են։
Սրահում տեղադրվել է նոր մեդիա համակարգ, որի էկրանի անկյունագիծը 17 դյույմ է (նախորդ տարբերակի մեքենայի մոտ այն 12,3 դյույմ էր), փոխանցում է Drom.ru-ն։
Ապակեպատ համայնապատկերային տանիքում հայտնվել է թափանցիկության կարգավորում։ Կարելի է ընտրել ամբողջական «մգեցման» ռեժիմը, և այդ դեպքում տանիքի միջով ուղևորներն ընդհանրապես տեսանելի չեն լինի։
Ուժային ագրեգատների մասով փոփոխությունների մասին տեղեկություն չկա։
Grandeur-ի նախորդ տարբերակն ունի շարժիչի չորս տարբերակ։
Հիմնականը համալրված է 2,5 լիտր ծավալով և 198 ձիաուժ հզորությամբ մթնոլորտային բենզինային շարժիչով։ Մեկ աստիճան բարձր՝ 3,5 լիտրանոց մթնոլորտային շարժիչն է՝ 300 ձիաուժ հզորությամբ։ Այս շարժիչները զուգորդվում են 8-աստիճան ավտոմատ փոխանցման տուփի հետ։
Առանձնանում է նաև 3,5 լիտրանոց շարժիչի երկվառելիքային տարբերակը՝ այն կարող է աշխատել ինչպես բենզինով, այնպես էլ հեղուկացված նավթային գազով (պրոպան-բութան)։ Գազային Grandeur-ը նախատեսված է տաքսոպարկերի և կորեական պետական հաստատությունների համար, իսկ դրա շարժիչի հզորությունը նվազեցված է մինչև 240 ձիաուժ։
Առաջարկվում է նաև զուգահեռ հիբրիդային տարբերակ, որը ներառում է 1,6 լիտրանոց տուրբոշարժիչ, էլեկտրաշարժիչ և 6-աստիճան ավտոմատ փոխանցման տուփ, համակարգի համակցված հզորությունը՝ 230 ձիաուժ։