Lamborghini-ն հայտարարել է 2025 թվականի ռեկորդային վաճառքի մասին. ընկերությունը ամբողջ աշխարհում մատակարարել է 10,747 սուպերմեքենա, որը փոքր-ինչ գերազանցում է 2024 թվականի 10,687 ցուցանիշը: Սա ապրանքանիշի համար նոր բարձրակետ է և ևս մեկ ապացույց, որ իր մեքենաների պահանջարկը մնում է բարձր, գրում է Robb Report-ի։
Եվրոպան, Մերձավոր Արևելքը և Աֆրիկան առաջատարն են մատակարարումների առումով՝ 4,650 մեքենաների վաճառքով: Ամերիկան երկրորդ տեղում է՝ 3,347 մեքենաների մատակարարմամբ, իսկ Ասիան և Խաղաղօվկիանոսյան տարածաշրջանը՝ 2,750 մեքենայով։
Սա Lamborghini-ի առաջին ռեկորդը չէ. ընկերությունն առաջին անգամ գերազանցել է 10,000 մեքենայի նշագիծը 2023 թվականին, երբ վաճառել է 10,112 մեքենա։ Այդ տարվա վաճառքի աճը կազմել է 10%՝ համեմատած 2022 թվականի հետ։
Հիբրիդային մոդելները՝ Urus SE-ն և Revuelto-ն՝ առաջին սերիական V12 հիբրիդային սուպերմեքենան, 2025 թվականին հատուկ ուշադրություն են գրավել։ Այնուամենայնիվ, բարձրակարգ էլեկտրական մեքենաների նկատմամբ ընդհանուր հետաքրքրությունը մնում է համեստ, և Lamborghini-ն չի շտապում անցնել ամբողջությամբ էլեկտրական մեքենաների։
Միևնույն ժամանակ, ընկերությունը բախվում է նոր մարտահրավերների։ ԱՄՆ-ն 25% մաքսատուրք է սահմանել իտալական ներմուծման վրա, ինչը հանգեցրել է Temerario-ի և Urus-ի գների համապատասխանաբար 7% և 10% աճի։ Թե ինչպես դա կազդի 2026 թվականի վաճառքի վրա, դեռ պարզ չէ։
«Չնայած շուկայական դժվար պայմաններին, մենք հպարտանում ենք մեր՝ 2025 թվականի արդյունքներով։ Սա հաստատում է Lamborghini-ի կարողությունը՝ առանձնանալու նույնիսկ մարտահրավերներով լի համաշխարհային միջավայրում։ Մեր ռազմավարությունը կենտրոնացած չէ առավելագույն ծավալի, այլ կայուն աճի և հաճախորդների սպասելիքները բավարարելու վրա»,-նշել է Lamborghini-ի գործադիր տնօրեն Ստեֆան Վինկելմանը։